Жиында И.Әбішев бүгінгі күні Су ресурстары комитетінің бассейндік инспекциялары әкімдіктермен және ТЖ аумақтық органдарымен бірлесіп 859 гидротехникалық құрылыстарға тексеріс жүргізгеніне тоқталды. Оның айтуынша, гидротехникалық құрылыстарды тексеру жұмыстарын комитеттің инспекциялары одан әрі жалғастыруда. Сондай-ақ, гидротехникалық құрылыстардың меншік иелеріне тасқын суды қауіпсіз өткізу бойынша шараларды қамтамасыз ету қажеттілігі туралы хат жолданған.
Брифингте белгілі болғандай, республикалық меншіктегі барлық су шаруашылығы нысандарында құрылыстар арқылы тасқын суды апатсыз өткізу бойынша іс-шаралар жоспарына сәйкес, көтергіш механизмдер мен электромеханикалық қондырғыларды тексеру және сынамалау өткізілген. Бұған қоса, 2017 жылғы 10 ақпаннан бастап тәулік бойғы кезекшілік ұйымдастырылған, тұрақты байланыс қамтамасыз етілген.
Тасқын су құбырларына байланысты төтенше жағдайда «Қазсушар» РМК-де инерттік материалдардың, ЖЖМ (жанар-жағармай материалдары) апатты қоры құрылған, арнайы техника дайындалған және су шаруашылығы объектілеріндегі электр желілерінің апаты болған жағдайда дизельді электр стансалары дайындалған.
«Жалпы, бүгінгі күні республикадағы су қоймаларында су шаруашылығы жай-күйі тұрақты және үнемі бақылауға алынған», – деп атап өтті И.Әбішев. Сонымен қатар, И. Әбішев Оңтүстік Қазақстан облысын ауыз сумен қамтамасыз ету жөнінде айтты. Оның сөзіне қарағанда, үстіміздегі жылы Ауыл шаруашылығы министрлігінің Су ресурстары комитеті мен «WIND POWER GmbH» Германия фирмасының арасында екіжақты меморандумға қол қойылған. Құжатта электр энергиясын өндіру арқылы қуаттылықты арттырып, Оңтүстік Қазақстан облысы халқын сапалы ауыз сумен қамтамасыз етуге бар күшті біріктіру, сондай-ақ, жаңа генерациялық қуатты құру мүмкіншілігімен жаңа су қоймаларын салу және қолданыстағыларды қайта жаңартуға қатысу көзделген.
Бұл келісім, Қазығұрт, Сарыағаш, Мақтаарал, Шардара аудандарының елді мекендерін және Шымкент қаласын ауыз сумен қамтуда үлкен бастама болып табылады.