«Жобаның арқасында стансалар мен оларға іргелес жатқан елді мекендердің халқы аурудың алдын алу үшін медициналық тексеруден өтеді, қажетті алғашқы көмек, кәсіби консультация және әрі қарай емделу үшін жақын орналасқан медициналық орталықтарға жолдамалар алады. Бұдан бұрын Елбасы Н.Назарбаев медициналық пойыздардың жұмысын жоғары бағалап, көліктік медициналық қызмет көрсетудің өзектілігін баса атап өткен болатын. Қазақстанның оңтүстік және батыс өңірлерінің халқы 2017 жылғы 18 сәуірден бастап 2017 жылғы 20 желтоқсан аралығында «Денсаулық» пойызының жүріп өткен жолы бойынша жоғары біліктілікті медициналық көмек ала алады. «Саламатты Қазақстан» медициналық пойызы Қарағанды қаласынан жолға шығады. 2017 жылғы 11 сәуір мен 6 қараша аралығында еліміздің орталық, солтүстік, шығыс өңірлерінің қалалары мен ауылдарына барады. Дәрігерлер бригадасының құрамында терапевт, педиатр, невропатолог, окулист, лор, гинеколог, хирург, уролог, маммолог, стоматолог сияқты негізгі мамандар бар. Медициналық пойыз қызметтерін Қазақстанның шалғайдағы елді мекендерінің медициналық көмекке мұқтаж тұрғындары, темір жол қызметкерлері мен зейнеткерлер және олардың отбасы мүшелері пайдалануға мүмкіндіктері бар», деді «Апаттық медицина темір жол госпиталі» АҚ басқарма төрағасы Ғабылнұр Әбділманов.
Сонымен қатар, «ҚТЖ» ҰК» АҚ «Әлеуметтік жобалар қоры» ұжымдық қорының директоры Ербол Кеңгірбаев медициналық пойыздар жұмысын ұйымдастыру барысына тоқталды.
«Ұжымдық қор пойыздардың қозғалысын, күтімі мен жөнделуін, жабдықтар мен қызметшілерінің күзетілуін ұйымдастырады, дәрігерлер мен пойыз бригадаларын тамақпен қамтамасыз етеді. Төтенше жағдайлар комитеті дәрігерлер мен жабдықтар қызметіне жауапты. Пойыздардың қозғалыс кестесі азаматтардың өтінімі мен мемлекеттік органдар сұраулары негізінде шалғайдағы стансаларда медициналық пункттердің болмауын ескере отырып жасалады. Сондай-ақ, қай облыстарда және қанша уақытта болғанына талдау жүргізеді. Әр медициналық пойыз көпбейінді мамандандырылған консультативтік-диагностикалық көмек көрсету үшін арнайы жабдықталған, медициналық қызметкерлердің тұруына арналған сегіз вагоннан тұрады. Медициналық қызметкерлер мен пойыз бригадасына арналған екі вагон-купеде ауа баптағыштар, теледидарлар, тоңазытқыштар, био-дәретханалар мен кір жуу орны орнатылған. Сондай-ақ, вагон-мейрамхана мен вагон-дизельді генераторы бар. Оның күші төтенше жағдай кезінде шағын елді мекендерге жарық беруге жеткілікті. Қалған төрт вагон халықты қабылдауға және медициналық көмек көрсетуге арналған. Дәрігерлерге арналған жайлы вагондар пойыздардың жолда жылына 300 күн болуына орай жабдықталған» деді ол.
Құрамдардың жүру бағыты мен дәрігерлер бригадасы көрсететін қызметтері туралы «Samruk-Kazyna Trust» әлеуметтік жобаларды дамыту қорының Басқарушы директоры Лима Диас, «Апаттық медицина темір жол госпиталі» АҚ басқарма төрағасы Ғабылнұр Әбділманов баяндады.
Рауан Қайдар,
«Егемен Қазақстан»