Ең алдымен «Қазақстан Республикасының кейбір заңнамалық актілеріне көлік мәселелері бойынша өзгерістер мен толықтырулар енгізу туралы» заң жобасын бірінші оқылымда таныстыру үшін сөз кезегі Мәжіліс депутаты Уәлихан Қайназаровқа ұсынылды. Ол аталған құжаттың мақсат-міндеті мен қызмет ауқымына қатысты мәселелерді егжей-тегжейлі баяндап, бірқатар түзетулер әуелі бірінші оқылымда, кейіннен депутаттар ұсынысымен екінші оқылымда қаралып, мақұлданды. Заң жобасында сауда мақсатында теңізде жүзу саласындағы ұлттық заңнаманы халықаралық шарттардың талаптарына сәйкес келтіру ұсынылғандығын да айта кетейік.
Сонымен қатар, құжатта шағын көлемді кемелерді есепке алу мен тіркеуге байланысты мемлекеттік жүйені жетілдіруге, рельстік көліктердің қауіпсіздігін қамтамасыз етуге баса назар аударылған. «Қазіргі таңда метрополитендегі қозғалыстың қауіпсіздігін және техникалық құралдардың жай-күйін бақылау жергілікті атқарушы органға бекітілген. Ал қалалық рельстік көлік түрлеріне қатысты бақылау жоқ. Соның салдарынан 2015 жылы Алматы қаласында трамвай 14 автокөлікке залалын тигізгені есімізде. Сондықтан да, бұл құжат темір жол саласындағы тармақ иеленушілер мен кірме жолдар тұтынушыларының арақатынасын реттеуді көздейді», – деді У.Қайназаров.
Жалпы отырыста «Ислам Конференциясы Ұйымына мүше елдер арасындағы экономикалық, техникалық және сауда ынтымақтастығы туралы бас келісімді ратификациялау туралы» заң жобасы депутаттар тарапынан қолдауға ие болды. Аталған құжат жөнінде негізгі баяндаманы жасаған Ұлттық экономика министрі Тимур Сүлейменов келісім мақсаты – Ислам Ынтымақтастығы Ұйымына мүше мемлекеттер арасындағы сауда-экономикалық, техника, технология салаларында ғылыми ынтымақтастықты дамыту және оны жүзеге асыру бағытындағы қарым-қатынасқа құқық тұрғысынан жаңа мүмкіндіктер ашып, өрісін кеңейтіп, бекіту екендігін атап өтті.
«Қазақстан 2015 жылғы 25 қарашада Ыстанбұлда қол қойған бас келісім арқылы сауда, инвестициялар, ғылым мен технология салаларындағы ынтымақтастықты нығайтуға ниетті. Ол бірнеше бағыт бойынша жүргізіледі. Сауда саласындағы келісім мүше елдердің бір-бірімен тең құқылы және кемсітпейтін сауда қатынастарын қолдануға, сауда алмасуларын кеңейтуге және дамытуға күш-жігер жұмсауға ұмтылыстарын көздейді. Ал инвестиция бойынша ИЫҰ-ға мүше елдер, әсіресе, Сауд Арабиясы, Кувейт, Біріккен Араб Әмірліктері, Катар, Бахрейн сияқты араб елдерінің тобы – дамыған және дамушы әлемнің экономикалары үшін ірі инвесторлар болып табылады.
Атап айтқанда, БАӘ инвестициялық қорларының ресурстары 1 трлн АҚШ долларын құрайды. Сондықтан, аталған елдердің біздің экономикаға тікелей инвестицияларының көлемі 2,3 млрд АҚШ долларын құрайды. Және үшінші бағыт ғылым мен технологияларға негізделген. Капиталдан басқа ислам елдерінде озық технологиялар бар. Осы кезеңде мұнай экспорттаушы елдер аталған шикізаттың экспортына негізделген даму моделін өзгертуге тырысуда. Олар ақпараттық-коммуникациялық технологияларға сүйенетін экономиканың озық секторларын қаржыландыру арқылы экономикалық жаңғырту саясатын жүргізуде», – деген министр, сондай-ақ Қазақстанға сарапшылар тарту, бірлескен зерттеулер жүргізу және білім беру стипендияларын алу арқылы тәжірибе және техникалық мүмкіндіктермен алмасуға мүмкіндік берілетіндігіне тоқталды. Осы орайда, биылғы жылдың 10-11 қыркүйегінде Астанада ИЫҰ-ның Ғылым және технологиялар жөніндегі бірінші саммитін өткізу жоспарланып отырғанын атап өткен жөн.
Сондай-ақ, жиын барысында депутаттар «Қазақстан Республикасының кейбір заңнамалық актілеріне қорғаныс және әскери қызмет мәселелері бойынша өзгерістер мен толықтырулар енгізу туралы» және «Қазақстан Республикасының кейбір заңнамалық актілеріне өсімдіктер мен жануарлар дүниесі мәселелері бойынша өзгерістер мен толықтырулар енгізу туралы» заң жобаларын екінші оқылымда мақұлдап, «Қазақстан Республикасының дипломатиялық қызметі туралы» Заңға өзгерістер мен толықтырулар енгізу туралы» заң жобасын жұмысқа қабылдады.
Нұрлыбек ДОСЫБАЙ,
«Егемен Қазақстан»