Еңбекте Президент көптеген көкейкесті мәселелерді қопара қозғаған. Атап айтқанда, мықты әрі жауапкершілігі жоғары Біртұтас Ұлт болу үшін болашаққа қалай қадам басатынымыз және бұқаралық сананы қалай өзгертетініміз туралы ойларымен бөліскен.
Президент өз еңбегінде таптаурын қағидалардан арылмасақ көш басындағы елдермен тереземізді теңеп, иық тірестіре алмайтынымызды ескертеді. Нұрсұлтан Назарбаев үш нәрсенің – тарлан тарихтың, жасампаз бүгінгі күн мен жарқын болашақтың үйлесіміне қол жеткізуге үндейді халықты. Ең алдымен, бәсекелік қабілетті күшейтуіміз керектігін айтады. Абай өзінің қара сөздерінде бұрынғы өткен бабаларымыздың өнеге тұтатын қасиеттерінің арасында намысшылдығын бөле атаған еді. Бәсекеге қабілеттілік дегенді әбден оңайлатып түсіндіретін болсақ, өзгелер жасағанды біз неге жасай алмаймыз, өзгелер игергенді біз неге игере алмаймыз деген намысшылдықты бәрінен бұрын атағанымыз жөн. Қанымызға сіңген көптеген дағдылар мен қасаң қағидаларды өзгертпейінше, біздің толыққанды жаңғыруымыз мүмкін емес. Әр нәрсені ұтымды пайдалануды Елбасымыз мінез-құлықтың прагматизмі деп атаған. Болашағыңды жоспарлау, ысырапшылдық пен астамшылыққа, даңғойлық пен кердеңдікке жол бермеу де осы заманғы прагматизмнің нақты көрінісі болуға тиіс дегенді айтады Елбасымыз. Жаңғырудың өзі жаһандық әлеммен қабыспайтын дағдылар мен әдеттерден арылуды білдіреді. Сонымен бірге, еңбекте жанталасқа толы мына заманда өзіміздің төл бітімімізді сақтай алудың қаншылықты маңыздылығы да айтылады. Ұлттық салт-дәстүрлеріміздің, тіліміз бен музыкамыздың, әдебиетіміздің, жоралғыларымыздың қадір-қасиеті аспандата көрсетілген. «Ұлттық рухымыз бойымызда мәңгі қалуға тиіс» – Елбасымыздың бұл сөзі әр қазақтың, әр қазақстандықтың жүрегінде жатталса дейміз.
Жаңғырудың жарқын жолын да осы еңбектен табамыз: «Біз жаңғыру жолында бабалардан мирас болып, қанымызға сіңген, бүгінде тамырымызда бүлкілдеп жатқан ізгі қасиеттерді қайта түлетуіміз керек». Ол қасиеттер тамырымызда бар. Тамырымызда бүлкілдеп жатқан сол қасиеттерді қайта түлетсек, жеріміз де, еліміз де өзгереді. Ол үшін өзіміз өзгеруге тиіспіз. Ал осы оңай ма? Тіпті де оңай емес. Еңбекте Елбасы саяси реформа мен экономикалық жаңғыруды қайта түлеудің айрықша маңызды екі процесі дей келеді де: «Енді осының бәрінен де ауқымды және іргелі жұмыстарды бастағалы отырмыз», деп қадап көрсетеді. Иә, келіспеске амалыңыз жоқ: саясатты өзгерту де қиын, экономиканы өзгерту де қиын, бірақ сананы өзгерту бәрінен де қиын. Бәрі де ойдан басталады. Ойлаудан басталады. Президент біздің баршамызды жаңаша ойлауға шақырып отыр. Жаңаша ойлаудың үлгісін өзі көрсетіп отыр.
Сауытбек АБДРАХМАНОВ,
Парламент Мәжілісінің депутаты