Мәжіліс, концерт залдары қоғамдық бірлестіктер үшін үнқатысу алаңына айналды. Одан бөлек, «Достық үйінде» этнос өкілдерінің қазақы мәдениетке жақындай түсуі үшін бар жағдай жасалған. Олар татулық пен бірлік үйінің мұражайындағы қазақ халқының көне жәдігерлерімен таныса алады. Сонымен қатар, этномәдени бірлестіктердің тарихи қол еңбектері, киімдері мен музыкалық аспаптары да сонда қойылған. Мұражайда қазір 68 экспонат сақтаулы тұр. Облыстағы этномəдени бірлестіктердің мəдени күндері, əр этностың ұлттық мерекелері тұрақты түрде кеңінен аталып өтеді. Бұл аймақтағы барлық этностардың ауызбіршілікте өмір сүруіне, қоғамдық келісімнің берік нығаюына үлкен ықпал ететіні сөзсіз. Қазақстанда тұрып жатқан әр этностың өкілі халық арасындағы достықтың, конфессияаралық түсіністіктің қаймағы бұзылмауына еңбек етіп, атсалысып келеді.
Бүгінгі күні облыстық Қазақстан халқы Ассамблеясының құрылымдары өңірдегі берекелі бірлік пен ынтымақты тірліктің қалыптасуына, қоғамдық келісімнің нығаюына жұмыс істейді. Ассамблеяның 11 этномәдени, 6 этнобағыттағы бірлестіктері, 145 Аналар кеңесі, 155 Қоғамдық келісім кеңесі, 22 Достық клубы, 1 Ғылыми-сарапшылық тобы, 1 Медиация кабинеті, облыстық мәслихатта депутаттық тобы, меценаттар тобы, Журналистер мен сарапшылар клубы, жастар қанаты, ақпараттық-насихаттық тобы бар.
Ассамблея қызметінің жаңа бағыттарының бірі – медиация институтын дамыту болып отыр. Былтыр «Достық үйінде» Медиация кабинеті ашылды. Қазіргі таңда, облыс көлемінде 38 кәсіби және 343 кәсіби емес медиатор жұмыс істейді. Облыстық ҚХА-ның ақпараттық-насихаттық тобы «Дін істерін зерттеу» орталығымен бірге қала көлеміндегі 16 оқу орнында экстремизмге, нәсілшілдікке, этностық және діни төзімсіздікке жол бермеу мақсатында «Мәңгілік Ел: негізгі өлшемдер», «Үлкен ел – Үлкен Отбасы» жалпыұлттық жобасының негізгі құндылықтары, «Мәңгілік Ел» Патриоттық актісін түсіндіру, «ҚХА-ның қызметі мен басым бағыттары», «Біртектілік пен бірлік: Болашағы біртұтас ұлт», «Әлем. XXI ғасыр» манифесі секілді тақырыптарда жастар мен мақсатты топтар арасында кездесулер өткізді. Осы күнге дейін ұйымдастырылған дәрістерге 17 мыңға жуық адам қатысты.
«Мәңгілік Ел» идеясын ғылыми тұрғыда талдау, түсіндіру және халық арасында кеңінен насихаттау мақсатында облыстық ҚХА жанындағы Ғылыми-сарапшылық топ мүшелері мен ғылыми қоғамдастық өкілдерінің бастамасымен 80-ге тарта ғылыми және ғылыми-көпшілік мақала жарияланды. Сонымен қатар, 4 монография, 3 әдістемелік және 2 оқу құралы жарық көрді. Ғылыми-танымдық бағыт бойынша да көптеген жұмыстар көш ілгеріледі. Әсіресе, ел Тәуелсіздігінің 25 жылдығына арналған «Мәңгілік Ел» пойызы жалпыреспубликалық акциясы, «Тәуелсіздік пойызы» облыс халқын бір серпілтіп тастады. Сондай-ақ, 2016 жылдың қыркүйек айында облыстық Қазақстан халқы Ассамблеясы мен Қызылорда облысының Азаматтық альянсы қауымдастығы меморандумға отырып, өзара бірлескен іс-шаралар атқаруда.
«Достық үйінде» тілдерді оқыту кабинеті де жүйелі жұмыс жүргізуде. Кабинетте мемлекеттік және ағылшын тілдері оқытылады. Соның ішінде, қазақ тілі өзге этнос балалары мен жастары үшін 63 сағаттық оқу бағдарламасы негізінде аптасына 2 реттен жүреді. Сондай-ақ, этномәдени бірлестік өкілдері қазақ халқының салт-дәстүріне арналған түрлі шараларға қатысып, өз танымдарын арттырып келеді. Этнос өкілдерінің балаларына мемлекеттік тілді үйретуге бағытталған «Мың бала» республикалық мәдени-ағарту жобасы аясында 813 шара өткізіліп, жобаға 35 047 бала қатысты. Жоба аясында 1 444 бала қазақ тілін меңгерді.
Облыстық Қоғамдық келісім кеңесінің отырыстарында жергілікті мекемелердің атқарған қызметтері туралы қоғамдық тыңдау жүйелі өткізілуде. Бүгінде облыстың Қоғамдық келісім кеңестері жұмыстарының оң тәжірибесі республика көлемінде насихатталып жүр. Мәселен, 2016 жылдың қарашасында Маңғыстау облысында Қазақстан халқы Ассамблеясының ұйымдастыруымен өткізілген семинарда Сырдария ауданының Н.Ілиясов ауылдық Қоғамдық келісім кеңесінің жұмысы үлгі ретінде таныстырылды.
Облыстық Аналар кеңесі қайырымдылық акциясын жүйелі түрде өткізіп тұрады. Айталық, Шахан қаласында орын алған қайғылы оқиғаға ұшыраған азаматтарға қолұшын созып, «Шахан – көмек», 1 наурыз – Алғыс айту күні мен Наурыз мерекесіне орай қайырымдылық акциялары ұйымдастырылды. Сондай-ақ, кеңес мүшелері облыстық Ассамблеяның ақпараттық-насихаттық тобының құрамында барлық аудандарда болып, Елбасы Нұрсұлтан Назарбаевтың Тәуелсіз Қазақстанды мемлекет ретінде қалыптастыру жолындағы еңбегі, этносаралық татулық пен қоғамдық келісім саясаты туралы дәрістер оқып, кездесулер өткізді.
«Достық үйі» ынтымақтың ұясы іспетті. Себебі, бекем бірлік пен берекелі тірлікке бағыт алған әр этностың өз тарихы мен мәдениетін насихаттауға мүмкіндік беріп, жағдай жасап отыр. Бұл да болса ұлтаралық келісімді одан әрі дамыту, түрлі этнос өкілдерінің мәдениетіне деген құрметті қалыптастыру, елдегі бейбітшілік пен достықты сақтау бағытында мемлекет тарапынан атқарылған жұмыстардың жемісі деуге толық негіз бар.
Ержан БАЙТІЛЕС,
«Егемен Қазақстан»
ҚЫЗЫЛОРДА