Елбасы мектебіндегі мерейлі әңгіме

Ата-бабаларымыз сан ғасырлар аңсаған Тәуелсіздіктің 20 жылдығы қарсаңында Шамалған ауылындағы Қарасай батыр атындағы орта мектептің «Шапағат» тарихи-өлкетану мұра­жа­йын­да «Елбасы және тәуелсіздік» атты дөңгелек үстел болып өтті. Мемлекет басшысы Нұрсұлтан Назарбаевтың білім алған алтын ұясында өткізілген жиынға оның сыныптастарымен қа­тар, соғыс және еңбек ардагерлері қатысты. Қарасай батыр атын­дағы орта мектептің оқушылары бүгінгі көркейген, қана­тын кеңге жайған мемлекеттің қол жеткен жетістіктері туралы ақындар жырларынан үзінділер оқып, туған ел, туған жер, қасиетті де қастерлі Отан туралы әндерді тамылжыта шырқады. Биылғы жылы ашылғанына он үш жыл толған «Шапағат» тарихи-өлкетану мұражайында мемле­кетіміздің Тұңғыш Президентінің балалық шағынан бастап, бүгінгі күнге дейінгі өмір жолы, еңбек жолының баспалдақтары туралы мол мәлімет жинақталған. Мұра­жай­дың жетекшісі, «Құрмет» ор­дені­нің иегері Рымкеш Байқоны­с­о­ва­ның айтуынша, жас ұрпақ бо­йында отансүйгіштік, патриотизм, адамгершілік қасиеттерді қалып­тастыруда аға ұрпақтың өнегелі өмір жолын жан-жақты зерттеп, білудің қажеттілігі зор. «Ата-бабаларымыздың аңсаған арманы орындалып, тәуелсіздікке қол жеткізуімізде Мемлекет басшысының орны зор екендігі айдай ақиқат. Уақыт өткен сайын қазақ­стан­дық­тардың әл-ауқаты жақсара түсуде. Мемлекетіміздің әлем таныған елге айналуы да Елбасымыздың бе­делінің, тынымсыз да еселі ең­бегінің нәтижесі» дейді Рымкеш Шәйкенқызы. «Елбасы және тәуел­сіздік» атты басқосуда қиын да күрделі жолдан өткен мемлекеттің бүгінгі тынысы және келешегі ту­ра­лы ой толғаған еңбек ардагерлері жас ұрпақ тәрбиесін де тілге тиек етті. Нұрсұлтан Әбішұлының сыныптасы, еңбек ардагері Қы­дыр­ғали Байбек уақыт сынынан өткен балалық шақтың есте қалған кейбір сәттеріне де тоқталды. – Сендер, айналайындар, яғни бүгінгі жас ұрпақ тәуелсіздіктің арқасында бақытты өмір сүріп жатырсыңдар,– деді ол мектеп оқушыларына қарап. – Елбасының да басты мақсаты жас ұрпақтың шаттыққа толы өмірі, сондықтан да, міне, осы бақытты, қазақ хал­қы­ның шаңырағына қонған бақ-дәулетті бағалай біліңдер. Туған Отан игілігі жолында қажырлы еңбек етсеңдер кемел келешекке сеніммен қарауға болады. Біздер, Сұлтан екеуміз мектепте 1-сыныптан бастап 10-сыныпқа дейін бірге оқыдық. Балалық шағымыз ел басындағы қиын да күрделі уақытпен сәйкес келсе де оған ешкім мойымады. Сол кездің жастарының бойында ерекше ерік-жігер болатын. Әсіресе Нұрсұлтан бәрімізден ерекшелене білді, қиын­дыққа тап болғандарға бірден кө­мекке келіп, қолтығынан демейтін. Есімде қалған бір сәт, оқушылар арасында жүгері жинаудан озып шығып, екеуміз «Юбилейный» деген медаль алғанбыз. Ең бір ға­жайып сәт, емтихан алдында мұға­лімдерімізге арнап таудың етегінен гүл теріп әкелетінбіз. Әлі есімде, бірінші, екінші және үшін­ші сы­ныптарда оқығанда ауылда электр жарығы жоқ, радио жоқ, көмір жоқ, сабақты майшамның жарығы­мен оқимыз, ата-анамызға да кө­мек­тесеміз. Бүгінгі уақыт биігінен өткен күндерге көз салсам, көңі­ліме қуаныш ұялайды. Арада қан­ша уақыт өтсе де, Нұрекеңнің бо­йында бала кезден қалыптасқан қарапайымдылық, мейірім мен ізгілік сияқты асыл қасиеттер сақ­талған, – дейді Қыдырғали Байбек өз ойын ортаға салып. Мемлекет басшысы «бүгінгі күн­ді түсініп, түйсіну үшін де, бола­шақтың дидарын көзге елестету үшін де кешегі кезеңге көз жіберуіміз керек» деп атап айтқа­нын­дай, «Елбасы және тәуелсіздік» атты басқосуға жиналғандардың тәуелсіздік пен бостандыққа қол жеткізген халқымыздың бүгінгі жетістігімен қатар, өткен күндер туралы естеліктерінің мектеп оқу­шылары үшін тағылымы мол бол­ғандығы айтпаса да түсінікті. Кемел ойлы, кең құлашты саясат­кер­дің балалық балғын шағы туралы сөз қозғап, сыр шерткендер ұс­таздың әрбір шәкірт өміріндегі ұмытылмас орнын да назардан тыс қалдырмады. – Елбасы білім алған бұл мектеп киелі мектеп, онымен бір мектепте оқығанымыз біздер үшін үлкен мақтаныш. Үшқоңыр – менің туған жерім, менің әкем Мырзатай Иханбердин осы білім ұясында ұзақ жылдар ұстаздық етті. Өз ұстаздарымыздың алдында басымызды иеміз, ондай тәлімі де тәрбиесі мол жандар қазір мүлдем аз. Мектептің қоғамдық жұмысына белсене араласатын, қоңыр дауыспен тамылжыта ән айтатын, жоғары сынып оқушысы – Нұр­сұлтан Әбішұлына біз сол кезде қызыға қарайтынбыз. Орыс тілін сол кезде тәуір сөйлей алмайтын біздерге қамқор болып «сендер «мировая литератураны» оқың­дар» деп ақылын айтып, қамқор болып жүретін. Сол сөзден кейін мен ауылымыздағы кітапханаға бар­дым. Бір таңқаларлығы, сөйт­сем біздің ауылдың кітапханасы өте бай екен. Сонда мен алғаш рет Джек Лондон, Мопассан, Бальзак сияқты классиктердің кітабын қо­лыма алып, туындыларымен та­ныстым. Көшбасшының сол бір бала кезіндегі алғырлығы әлі күнге дейін есімде қалып қойыпты,– дейді Панар Мырзатайқызы өткен күнге көз жіберіп. Мектеп қабырғасында, әлі оңы мен солын танымайтын аңғырт та аңқау балаң кезеңнің өзінде бір мектепте бірге оқығандардың да, сыныптастарының да Нұр­сұлтан­ның сол кездің өзінде «лидер» болатындығына сендік деп атап айтуы көп нәрседен хабар берсе керек. Екі мыңға жуық құнды жәдігерлер жинақталған, Мемлекет басшысының өмір және еңбек жолы мен тарихы терең де қа­сиетті өлке шежіресінен сыр шертетін «Шапағат» тарихи-өлкетану мұражайы құнды экспонаттармен уақыт өткен сайын толыға түсуде. Ардагер ұстаз, көп балалы ана Балзейнеп Бейсенбаева мектеп мұражайына музыкалық аспап – патефон сыйлады. – Мен 84 жастамын, тірші­ліктің қиындығын да, қызығын да көрдік. Халқымызда «Азаматына қарап, ауылын таны» деген ұла­ғатты сөз бар. Нұрсұлтан Әбіш­ұлындай басшысы бар біздің халқымыз, жайқалған бәйше­шек­тей болып өсіп келе жатқан жас ұрпақ, шын мәнісінде де бақытты, келешегі кемел. Ел тәуелсіздігіне 20 жыл, халқымыз бейбіт өмірде, тату-тәтті өмір сүріп жатыр. Осы­ның барлы­ғы туған халқы, қа­сиетті Отаны үшін қажырлылық пен бел­сенділік танытып жүрген Мем­лекет бас­шысының еңбегінің жемісі. Кезінде ауылымызда «Шам­­­­шырақ» ансамблін құрдық, еселі еңбек еттік. Сондағы мақ­сатымыз ауылымыз, еліміздің көр­кейіп, гүлдене беруі,– дейді Балзейнеп Бейсенбаева. Еліміз тәуел­сіз­дігі­нің 20 жылдығына арналған іс-шараға қатысқан мектеп оқу­шы­лары «Нұрлы күнге ұмтылған қазақ бүгін, сүйсіндірген әлемді азаттығым» деп ән мен жырдан шашу шашты. Бақыт БАЛҒАРИНА. Алматы облысы, Қарасай ауданы.