Кеше Қазақстан Республикасының Сыртқы істер министрі Ержан Қазыханов БҰҰ-ның Босқындар мәселесі жөніндегі Жоғарғы комиссары басқармасының Орталық Азиядағы аймақтық өкілі – үйлестірушісі Сабер Азаммен кездесті. Кездесу барысында тараптар басқарма жұмысының аймақтағы өзекті мәселелерін және Қазақстан мен БҰҰ-ның Босқындар мәселесі жөніндегі Жоғарғы комиссары басқармасы арасындағы ынтымақтастық мәселесін талқыға салып, оның дамуын оң бағалады. Өзара түсіністік ортақ гуманитарлық бағдарламаларды жүзеге асыру үдерісінен айқын көрінеді.
Босқындардың негізгі халықаралық қорғаушысы ретінде аталған басқарманың ерекше рөлін атай отырып, Е.Қазыханов адам құқықтары, соның ішінде босқындар мен мигранттарды қоса алғанда, сыйлау мен сақтау ісі ұлттық саясатымыздың ең маңызды тармағының бірі болып табылатынын атап көрсетті.
Осыған орай, қазақстандық тарап екіжақты ықпалдастықтың барлық мәселелері бойынша үнқатысуға дайын екендігін жеткізеді, атап айтқанда, басқарманың тәжірибесін зерттеуде және босқындар мәртебесін беруде, паналату механизмі мен жүйесін, азаматсыздықты қысқарту үдерістерінде өзара пікір алмасуға әркез әзір екендігін мәлімдейді, деді Е.Қазыханов.
С.Маза өз кезегінде Қазақстанда наурыз айында Орталық Азиядағы босқындарды қорғау және халықаралық миграция жөніндегі аймақтық конференцияның жемісті өткенін атай отырып, Алматы декларациясының басымдықтарын жүзеге асыру мақсатында аймақтағы елдердің іс-әрекеттерін үйлестіру маңыздылығын ерекше қозғап өтті.
Солтүстік Африка мен Таяу Шығыстағы соңғы оқиғалар аясында босқындар мен амалсыздан көшіп жүргендердің мәселесі ерекше өзектілікке ие, осыған байланысты тараптар Қазақстанның алдағы ИКҰ-дағы төрағалығы барысында да екіжақты қарым-қатынасты дамыту мүмкіндіктерін қарастырды, деп хабарлады еліміз Сыртқы істер министрлігінің баспасөз қызметі.