Кеше Алматы қаласында баршақалалық дабыл қағылып, оқу-тәжірибелік сейсможаттығу шарасы өткізілді. Таңертеңгі сағат 10-да басталған бұл шара араға минуттарды тастап, біршама уақытқа дейін созылды. Қаланың Думан, Шаңырақ секілді шалғай аудандарында төтенше жағдайлар департаментінің мамандары ел ішінде болып, дабылды дауыс күшейткіштер арқылы таратты. Телерадио арналары да бұл шараға өз үлестерін қосты.
Күнілгері хабардар болғандықтан, аңыраған дабыл үнінен шошымай, ерінсек те жоғарғы қабаттан төмен түсіп, далаға беттедік. Қанша рет дабыл қағылса, сонша рет түсіп-шықтық. Неге? Тәртіп – баршаға ортақ. Рас, бұл енді азаматтық талап болар. Дегенмен, «мына дабыл менің қамым үшін соғылды ғой», деген ойдан кейін қанша жерден қызылкөз пенде болсаң да, әрісі – ел, берісі – қала басшылығының бұл шарасын қызу қуаттайсың.
Алматыдағы мамыр айының басындағы сілкіністен кейін қала жұртшылығы да, көптеген мекемелер мен ұйымдар да бар қадари-қалінше зілзала кезінде жан сақтаудың амал-тәсілін меңгеруге көшкен. Телеарналарда да елді шошытып алмай тиянақты насихат жүргізу жұмыстары жолға қойылды. Байқағанымыз, қазір қала жұрты әу бастағыдай ретті-ретсіз өре түрегелмей, әр нәрсеге байыппен қарап, әрбір ақпараттың анығын аңдайтын болған. Себебі, қала билігі елмен қарым-қатынас орнатудың барша апаттың алдын алуға сеп екенін енді түйсінді. Әу баста абдырап қалған басшылық та, халық та біраз сарсаңға түскенін кімнен жасырайық?
Жапон жерінде Құдайдың құтты күні 3-4 баллдық сілкініс болып жататынын теледидардан көріп те үлгердік. Сонда бір жапонның жансауғалай қашқанын, елді еліртіп бүлікке бастағанын байқамадық. Себебі, «Сабыр бар жерде – салауат бар». Оқу қонған күншығыс елі зілзаланың салқынын сезгеннен дабылдатып өз халқын алапаттан арашалауға асығады екен. Нәтижесінде – кісі шығыны өте аз. Ел аман, жұрт тыныш болса қираған дүниені қалпына келтіру әп-сәтте. Мұндай жалпыхалықтық сауаттылыққа (қауіпсіздік шарасын меңзеп отырмыз) жапондар бір жылда немесе бірер жер сілкінісінен кейін қол жеткізген жоқ. «Кемедегінің жаны бір», деп ел мен билік біріге қимылдаудың арқасында нәтиже шығарып отыр.
Ажал мен қатер айтып келмейді, табиғаттың тосын буырқаныстары біздің пешенемізге жазылса, одан қашып құтылмақ жоқ. Мейлі сына, мейлі ғайбатта, бәрібір Табиғат – Ана адам баласын алалап келіп арандатпайды. Бұра тартып, бұза шабуды ермек қыла бермей өз отбасымызды, өз ортамызды тәртіпке, сауаттылыққа сүйрей білсек жоғалтарымыздан табарымыз көп болмақ.
«Баршаңыздың назарыңызға!!!» дейтін ұранмен жүргізілетін бұл шара Алматы қалалық әкімдігі ведмоствоаралық коммиссиясының шешімімен тоқсан сайын бір рет, ал кей мекемелер мен кәсіпорындарда ынтасына қарай дембіл-дембіл жалғасып тұратындығын еске салғымыз келеді.
Қанат ЕСКЕНДІР, журналист.
Алматы.