Кеше Қазақстан Республикасының Сыртқы істер министрі Ержан Қазыханов Беларусь Республикасының Президенті Александр Лукашенконың Қазақстанға ресми сапары аясында беларусьтық әріптесі Сергей Мартыновпен кездесті, деп хабарлады ҚР СІМ-інің баспасөз қызметі.
Кездесу барысында тараптар саяси үнқатысуды нығайту мен сауда-экономикалық саладағы ынтымақтастықтың алдағы даму болашағын қарастырып, Қазақстан мен Беларусь мемлекет және үкімет басшылары берген тапсырмаларды тиімді жүзеге асыруды қамтамасыз ету жайын талқылады. Дипломаттар уағдаластықтарға белгіленген мерзімге дейін қол жеткiзу маңыздылығын атап өтті.
Бірлестіктер шеңберіндегі өзара ынтымақтастықтың өзекті мәселелерін талқыға сала отырып, тараптар Ұжымдық қауіпсіздік туралы шарт ұйымы және ТМД шеңберіндегі өзара қатынастарды ілгері дамыту бойынша пікір алмасты. Сонымен қатар, ТМД-ның 20 жылдығына арналған іс-шаралардың маңызын ерекше атады.
Өзара экономикалық ықпалдастық мәселелерін талқылау барысында Кедендік одақтың қызмет жасауы екі тарапты да қанағаттандырып отырғандығы айтылды. Біртұтас экономикалық кеңістік және Еуразиялық экономикалық одақ құру жөніндегі жоспарлар Қазақстан-Беларусь қарым-қатынасының стратегиялық және ұзақ мерзімді сипатқа ие екендігін тағы да қуаттағаны атап көрсетілді.