Кеше Қазақстан Парламенті Мәжілісінің Төрағасы Орал Мұхамеджанов Румынияның еліміздегі Төтенше және өкілетті елшісі Емил Рапчамен кездесті, деп хабарлады осы палатаның баспасөз қызметі.
Әлемдік қаржы дағдарысының әсеріне қарамастан, екі ел арасындағы экономикалық байланыс бәсеңдеген жоқ, қайта қарқын алды. Айталық, 2009 жылы Қазақстан мен Румыния арасындағы сауда айналымы 878 млн. АҚШ доллары көлемінде болған еді. Ал 2010 жылғы көрсеткіш 1,4 млрд. АҚШ долларын құрады. Үстіміздегі жылдың алғашқы айлары да оң нәтиже беріп отыр. Кездесуде тараптар сауда-экономикалық байланыстың қарқын алып, алдыңғы жылмен салыстырғанда 20 пайызға өскеніне тоқталып өтті.
Орал Мұхамеджанов: «Қазақстан Республикасының Президенті Нұрсұлтан Назарбаевтың Румынияға барған сапары және Румыния Президенті Траян Басескудің біздің елге жасаған сапары қос мемлекеттің ынтымақтастық қарым-қатынасының арта түсуіне серпін берді. Әлі де байланыстың жақсы бола түсетініне үміт артамыз», – деді.
Өз кезегінде Емил Рапча Қазақстан әлем назарындағы ел екенін, Астанада халықаралық маңызды басқосулардың жиі өтуі саяси-экономикалық байланыстардың өріс алуына жол ашатынын айтып өтті. Соның бірі жуырда өткен Еуропа Қайта құру және даму банкі басқарушылар кеңесінің отырысы екені анық.
Екі ел Парламентінде ынтымақтастық жөніндегі депутаттық топ бар. Қазақстан Парламентіндегі топтың құрамына 22 депутат енген. Тараптар екі елдің мәдени-рухани байланыстарын дамыту туралы ойларымен бөлісті.
Елші Мәжіліс Төрағасына Румыния Парламенті депутаттар палатасының төрайымы Роберта Альма Анастасенің шақыруын табыс етіп, заң шығарушылық тәжірибесімен алмасу мақсатында өз еліне сапармен баруға шақырды.