«Дала қыраны» халықаралық оқу-жаттығулары мәреге жетуге жақын. Осымен тоғызыншы рет өткізіліп отырған бұл жаттығуларға Қазақстан, Ұлыбритания, АҚШ, Литва және Қырғыз Республикасы қарулы күштерінің әскери қызметшілері қатысып жатыр.
14 тамыздан бастап көп ұлтты күштердің әскери контингенті шартты қақтығыс аймағында бітімгершілік операцияларын тәжірибе түрінде пысықтау үстінде.
Бітімгершілік күштері жексенбі күні ертемен белгіленген аумаққа жетіп, өздеріне жүктелген тапсырмаларды орындауға кірісті. Олар екі күн бойы жағдайды тұрақтандырып қана қоймай, гуманитарлық операцияларды да жүргізуде. Жауапты аумақтағы іс-қимылдарды бақылауға алып, бекеттерде, жылжымалы патрульде кезекшілік жүргізіп, босқындардың көші-қонын бақылайды.
Әскери қызметшілер жарылғыш заттарды залалсыздандырып, заңсыз қаруланған банды құрамының көзін жойды.
Жаттығулардың басты тапсырмаларының бірі – бөлімшелердің шоғырлануы және іс-қимылдардың айқындығы, су кедергілерінен өту, әр түрлі жүктерді алып жүру, ең бастысы, қауіпсіздікті қамтамасыз ету бойынша операциялар жүргізу. Осы қимылдардың бәрі бүгін, 16 тамызда қайыра пысықталатын болады.
Әскери бақылаушылар мен шет мемлекеттерден келген сарапшылар қазақстандық жауынгерлер өздерінің біліктіктерімен және тәртібімен ерекшеленетінін айтуда.
Бұл жаттығулар бейбітшілікті қолдау операцияларындағы «Қазбригтің» жедел қимыл жасаудағы жетістігі мен қазақстандық бітімгерлік бөлімшенің көп ұлтты құрамда тапсырмаларды орындау қабілетін тексеру болып табылады.
Оксана ПАРПУРА, Қорғаныс министрлігі баспасөз қызметінің қызметкері.
––––––––––––––––
Суретті түсірген Ермек САРБАСОВ.