Тәуелсіз елдің тұғыры биік, іргесі бекем болуы жолында еңбектеніп келе жатқан сондай ерлер бар. Олар елге ерен еңбек сіңірумен және елдің тұрақтылығын қамтамасыз етумен қатар, мемлекеттік тұрақтылықты да насихаттайды. Елбасы Нұрсұлтан Назарбаев «Қастерлі Отанымызға қалтқысыз қызмет ету және оны қорғау – әрбір азаматтың қасиетті борышы», деген болатын. Халықтың қаһарман ұлдары да, қол бастаған перзенттері де Отан деген ұлы ұғымның аласармауын, тыныштық пен татулықтың тұғырға көтерілуін көздеді. Алаш ардақтысы Әлихан Бөкейханов «Ұлтқа қызмет ету білімнен емес, мінезден» дегенде де осындай батыл мінезді меңзеген болар. Бүгінгі таңда Қордай ауданы, Отар қаласы, Гвардейск қалашығы №40 әскери базасы 75263 әскери бөлімінің командирі қызметін атқарып жүрген Нұрлан Әбдіқадыров та алдыңғы толқынның ерлік жолын жалғастырып келе жатқан азамат. Еңбек жолын 1999 жылы взвод командирі болып бастаған ол осы уақытқа дейін әскери саланың түрлі сатыларынан өтті. Түрлі сынақтарға төтеп берген ол Отан қорғау жолындағы ойынан айныған емес. Қайта күн сайын шыңдалып, тәжірибе жинап келеді. Қалыптастырған тәжірибесін ұлт тұрақтылығы жолында жұмсауды көздейді. Ирак мемлекетіне 2003 жылы елімізден инженерлік-саперлік жасағы жіберілгені белгілі. Сол кезде Иракқа жасақ командирінің орынбасары болып Нұрлан Әбдіқадыров та аттанады. Адам өмірі сынға түсіп, ел тағдыры талқыға салынған тұста алты ай бойы сол жерде берілген міндеттерді мүлтіксіз орындайды. Әскери саланың қыр-сырын меңгерген сол кездегі капитан шеніндегі азамат әрбір сында өз ісіне адал берілген маман екенін дәлелдейді. 2007-2008 жылдары Алматы қаласы 61993 әскери бөлімінде қызмет атқарып жүргенде де қазақстандық бітімгершілік тобының құрамына кіреді. Бұл кезде майор шенін алған Нұрлан Әбдіқадыров мемлекеттің мәртебесі, ұлттың абыройы жолында еңбек етеді. – 2008 жылы инженерлік-саперлік жасағының командирі ретінде Ирак мемлекетіне екінші рет жіберілдім. Ирактың Бағдад, Әл-Куд қалаларында болып, бітімгершілік операциясына қатыстық. Әрине, күн сайын емес, сәт сайын өмірімізге қауіп төнген кездер болды. Мәселен, ол жерде жарылғыш заттар көп. Ал оны табу, тауып көзін жою біздің міндет болып саналады. Сондықтан да қателесуге ешқандай жол жоқ еді, – дейді Нұрлан Алпысұлы. Нұрлан Әбдіқадыров 1996-1999 жылдары Қазақстан Республикасы Қарулы Күштерінің Әскери академиясын бітірген. 2012 жылы Ресей Федерациясының Қарулы Күштерінің Құрлық әскерлері Жалпыәскери академиясының әскери-оқу орталығын аяқтаған. «Жауынгерлік ерлігі үшін», ІІ дәрежелі «Айбын» мемлекеттік наградаларымен марапатталған азамат бүгінде төрт перзент тәрбиелеп отыр. Нұрлан Алпысұлы әуелі атақ үшін емес, абырой үшін қызмет атқарып жүргенін айтты. Бейбітшілік үшін басын бәйгеге тігуге дайын ол тәуелсіз еліміздің тұғырлануына әскери маман ретінде үлес қосып келеді. – Елбасымыздың қолдауы бізді әрдайым жігерлендіріп, алға жетелейді. Елбасы Нұрсұлтан Назарбаев әр сөзінде әскери салаға ерекше көңіл бөліп келеді. Бұл салада қызмет етудің асқан абырой екенін, зор мақтаныш екенін айтады. Батыр бабамыз Бауыржан Момышұлы «Тәртіпке бас иген құл болмайды, тәртіпсіз ел болмайды» деген сөзді бекер айтпаған. Тәртіп пен тәрбие – тұрақтылық пен татулықтың кепілі, – дейді ол өз сөзінде. Талап пен тәртіпті ту еткен азаматтың өзінен кейінгі буынға берері де мол. Қырыққа толмай қамал алған оның бейбіт күндегі батырлардың қатарында болатындығы заңдылық. Нұрлан Әбдіқадыров бұл күнде подполковник шеніндегі әскери қызметкер. Талай жылғы табан ақы, маңдай тердің ақталғанын көзбен көрген азамат. Ел мен жердің киесін ұғынып, қасиетін жете түсінген адамның қашанда жолы ашық, жұлдызы жоғары болмақ.
Хамит ЕСАМАН, «Егемен Қазақстан» Жамбыл облысы