Бұл – Ақтөбе өңірінде шығатын бірден-бір республикалық әдеби –көркем, көпшілік журнал. Облыстық әкімдікте осы «Адырна» республикалық әдеби-көркем, көпшілік журналының тұсаукесері өтті. Оған журналистер, әдебиетсүйер қауым қатысты. Басылымның бас редакторы ақын, көсемсөзші Мейірхан Ақдәулетұлы журналдың ұстанған бағыт-бағдары, алдағы шығармашылық жұмыстары туралы әңгімеледі. Ол жаңа журналдың тұсаукесері Алматыда Қазақстан Жазушылар одағында да өткенін, одақ басшылары мен шығармашылық қауымның жылы қарсы алғанын тілге тиек ете келіп, журналды қазақ әдебиетінің дамуына серпін беретін басылым жасауға талаптанып жатқанын атап өтті.
– Осындай бір әдемі журнал шығаруды 2012 жылдан ойлап жүр едім. Соның сәті биыл түсті. Бұл бастамамыз облыс әкімі Бердібек Сапарбаев тарапынан қолдау тапты. Өңір басшысының қолдауымен осындай журнал дүниеге келді. Алғашқы саны үстіміздегі жылғы қараша айында жарық көрді. Қазір екінші саны да дайындалды, баспаханадан келесі аптада шығады. «Қазпошта»АҚ арқылы жазылдыруды ойластырып жатырмыз. Журналды еліміздің барлық өңірлеріне тарату көзделуде. Мұнда ең үздік туындыларды жариялаймыз деген үмітіміз бар, – дейді Мейірхан Ақдәулетұлы.
Журнал Ақтөбедегі «А-Полиграфия» ЖШС баспаханасында басылып, шығарылады. Әзірге 2 мың данамен шығуда. Құрылтайшысы «IDEA ltd» ЖШС болып табылады.
Журналдың тұсаукесерінде сөз алған «Қазақстан РТРК» Ақтөбе облыстық телекомпаниясының директоры Раукен Отыншин ақын Мейірхан Ақдәулетұлының кезінде «Алтын орда» газетін Ақтөбеде және Атырауда шығарып, республикалық деңгейдегі басылымға айналдырғанын, бұл журналды да оқырмандардың көңілінен шығатындай деңгейге көтеруге шығармашылық ізденісі жететінін атап өтті.
Сонымен Ақтөбеде «Адырна» республикалық әдеби-көркем, көпшілік журналы алашына жол тартты. Жаңа басылымның қазақ әдебиетіне қосар үлесі, оқырмандарын ойлы шығармалармен сусындатудағы қадамы құтты болсын дейміз біз де.
Сатыбалды СӘУІРБАЙ, «Егемен Қазақстан»
АҚТӨБЕ
Суретті түсірген
Хайреден РАУШАНОВ