«Оңтүстік» аймақтық инвестициялық орталығы 2009 жылдан бері 14 мыңға жуық жобаға қолдау жасап, жұмыс жасаймын дегендердің қолына балық емес, қармақ ұстатты. Бұған дейін «Максимум» АИО аталып келген орталық күнгей аймақтың имиджін көтеру үшін «Оңтүстік» атына ауыстырылған еді.
ОҚО аймақтық коммуникациялар қызметінде өткен брифингте «Оңтүстік» АИО төрағасы Арман Данаев бүгінге дейін жалпы сомасы 5 429,9 млн теңге болатын 4 114 жұмыс орны ашылатын 1 608 жоба қаржыландырылғанын айтты. Аталған жобалар іске қосылған уақытта жыл сайын 23 млрд теңгенің өнімі өндіріледі деп жоспарлануда.
«Оңтүстік» АИО индустрияландыру картасына енген 6 жоба, мал шаруашылығын дамыту бағытында 661, көктемгі дала жұмыстары бойынша 839, интенсивті бау шаруашылығы бойынша 2 жоба, ал ауылшаруашылық өнімдерін қайта өңдеу саласы бойынша 3 жоба және басқа да бағыттарда 97 жобаға қаржылай қолдау көрсеткен.
Жалпы, 2009-2016 жылдары «Оңтүстік» аймақтық инвестициялық орталығы мен еншілес «Ырыс» микроқаржы ұйымы бірлесе отырып жалпы құны 41 889 млн теңгені құрайтын 13 921 жобаны қаржыландырды. Нәтижесінде 36 419 жаңа жұмыс орны ашылды.
2016 жылы орталық қаржыландырған жобаларының аудан, қала кесіндісі бойынша қазіргі таңда Ордабасы ауданы ең жоғары көрсеткішпен тіркеліп отыр. Яғни биыл аталған ауданда 126 жоба 1 214,0 млн теңгеге несиелендірілген.
Сондай-ақ, компания басшылығы алдағы жылға өз алдына бірқатар міндеттемелер мен жоспарлар қойып отырғандығын мәлім етті. Айтылған деректер бойынша, орталық қосымша екі жаңа бағдарлама әзірлеп ұсынуды жоспарлап отыр. Олар – ауылшаруашылық өнімдерін өңдеу және бизнес инкубатор бағдарламалары.
Бақтияр ТАЙЖАН,
«Егемен Қазақстан»
Оңтүстік Қазақстан облысы