...Ерте ерте ертеде айдаһарға айналып келе жатқан әбжылан оянып кетіп, жер бетіне шығып, маңайын жалмап, үлкен апат, үрей туғызады. Ауылдарды отқа орап, қарсы келгенді қақыратып келе жатқанда, бір қыран бүркіт балапанын қорғап, онымен айқасып, ақыры әбжылан қайта жер астына құлап, жоқ болады. Ал қыран отқа оранған ұядан балапанын алып, алысқа ұшып кетеді. Адам жұтып дәніккен әбжылан Күн тұтылып, өзінің айдаһарға айналар сәтін асыға күтеді. Ал бұл айдаһарды жеңе алатын тек баяғы балапан – Мұзбалақ қана.
Бұл күндері Ш.Айманов атындағы «Қазақфильм» АҚ өткен жылы өндіріске жіберген «Мұзбалақ» толықметражды анимациялық фильмінің түсірілім жұмыстары жалғастыруда. Тұрдыбек Майдан мен Тілек Төлеуғазы режиссерлік жасап жатқан «Мұзбалақтың» экранға шығуы қазақ мультипликациясының 50 жылдығына сәйкес, 2017 жылдың күзінде аяқталады деп жоспарлануда.
Сондай-ақ, «Қазақфильм» киностудиясының негізінде жасалған «Анимациялық кино» шығармашылық-өндірістік бірлестігінде өндіріске жібергелі отырған «Күлтегін» толықметражды мультфильмінің дайындық жұмыстары басталды.
Ұлттық студияның «Анимациялық кино» шығармашылық-өндірістік бірлестігі 2009 жылдан бері жұмыс істейді. Осы аралықта 36 қысқаметражды анимациялық фильм (жылына орта есеппен 6 фильмнен), сондай-ақ, қазақ анимациясы тарихында тұңғыш рет 3D форматында «Ер Төстік және Айдаһар» толықметражды анимациялық фильмі түсірілді.
Өткен жылы Ш.Айманов атындағы «Қазақфильм» киностудиясы «Қазақстан – біздің ортақ шаңырағымыз» атты анимациялық фильм топтамасының тұсауын кесті. Бұл түрлі халықтардың ең қызық әңгімелерін топтастырған әрқилы ертегілердің бірегей жинағы болып табылады. Аталған анимациялық топтаманың Қазақстан халқы Ассамблеясының 20 жылдығына арналған кіріспе бөлімі еліміздің тарихы мен мәдениеті жайында, сондай-ақ, бейбітшілік пен келісім жағдайында 130-дан астам ұлттар мен ұлыстар өмір сүріп жатқан қазіргі тәуелсіз Қазақстан жайлы баяндайды. Қалған сегіз фильм халық ертегілерінің желісі бойынша жасалған.
Айнаш ЕСАЛИ,
«Егемен Қазақстан»
АЛМАТЫ