Заманауи бағытта жұмыс істеу жүйесі қалыптасқан білім ошақтарының арасында Бидайық орта мектебінің орны бөлек. Ұжым биыл «Үздік мектеп» аталымы бойынша 17 миллион теңгенің сертификатын жеңіп алды. Мұндай құрмет ұстаздар қауымы үшін зор мәртебе әрі зор жауапкершілік жүктейді. Еліміз егемендігін алғаннан бергі кезеңде білім ордасы уақыт ағымына сай жаңа келбетін қалыптастырып, оқу мен тәжірибені терең ұштастырып келеді. Ұстаздар қауымына жаңашылдық қасиеттер тән. Оқу кабинеттері қазіргі талаптарға сай жабдықталған. Педагогтардың кәсіби дамуы жете ескеріліп, ақпараттық-коммуникациялық технологиялар оқу-тәрбие үдерісіне белсенді түрде енгізіледі. Жаңаша оқу, модульдік технология, сыни тұрғыдан ойлау, жобалау технологиялары кеңінен қолданылады. Семинарларда, педагогикалық оқуларда, шеберлік сыныптарында іс-тәжірибелер жан-жақты таныстырылады.
Бидайық орта мектебі соңғы үш жылда үлкен жетістіктерге қол жеткізді. 2013 жылы Ұлттық бірыңғай тестілеудің нәтижесі бойынша облыстың он үздік мектебінің қатарына енді. Келесі жылы «Тиімді ауыл мектебі» атты қашықтық байқауының үшінші дәрежелі дипломымен марапатталды. Он ұстаз «Оқу үдерісінің озық әдісі – жаппай білім беру сапасының негізі» атты сынама жобаға қатысты. Қазақстан Республикасы Тәуелсіздігінің 25 жылдығына арналған «Сені жырға қосамын, туған өлкем!» аудандық көркемөнерпаздар байқауында ұжым бас жүлдеге ие болды.
Әр оқушы – бір әлем. Олардың әрқайсысына жеке тұлға ретінде қарап, бағалап, талантын ашып, өзіне артылған жүкті абыроймен орындап жүрген ұстаздар аз емес. Бастауыш сынып мұғалімі Үмітжан Нұрғазина республикалық сайыста «Үздік шеберлік сыныбы» аталымын жеңіп алды. Зүлфира Тілеуқабылова «Жылдың үздік педагог-психологы» атанса, тарих пәнінің мұғалімі Дәурен Ысқақов республикалық «Үздік жас маман» байқауының жеңімпазы болды. Ұстаз алдынан тәлім-тәрбие алып, еңбегін ақтап, мектептің атын шығарып жүрген түлектеріміз көп-ақ. Мектебімізде республикалық «Зерде» ғылыми жобалар байқауының ағылшын тілі мен математика пәндерінен өткен қашықтық олимпиадаларының жеңімпаздары оқиды. Оқушылардың талантын жан-жақты ұштайтын «Ерке қыз», «Үкілі домбыра», «Жас талап», «Қол өнері» үйірмелері жұмыс істейді. Облыстық, аудандық спорттық жарыстарда мектеп намысын қорғайтын оқушыларымызды дене тәрбиесі пәнінің мұғалімдері Дулат Мұхамедияров пен Арман Шайсұлтанов шыңдайды. Өз ісіне әркез үлкен жауапкершілікпен қарайтын мұндай жас мамандарымыздың ертеңінен мол үміт күтеміз. Ата-аналар да ұрпақ тәрбиесінен шет қалмайды.
Ауылдық білім ошақтары арасында бірінші болып «Үздік мектеп» атағын жеңіп алуымыз біраз жайтты аңғартса керек. Мұның өзі ұжымның қоян-қолтық атқарған жұмысының және тәуелсіздік жылдарында ауылдық мектептерге барлық жағдайлардың жасалуының нәтижесі деп білеміз.
Раиса КӘРІМЖАНОВА,
Бидайық орта мектебінің директоры
Солтүстік Қазақстан облысы,
Уәлиханов ауданы