Петропавлда волейболдан Желтоқсан оқиғасының құрбаны Нұржан Қалиасқаровты еске түсіруге арналған турнир болып өтті. Батыр оғлан Алматыда өзі қатарлы студенттермен бірге алаңға шығып, кеңестік өктем саясатқа наразылық білдірген. Қамауға алынып, ұрып-соғылған. Оқудан, комсомолдан шығарылған. Кейін ауыр дене жарақаты асқынып, 25 жасында қайтыс болған.
Турнир өскелең ұрпақ бойына елді, жерді, Отанды сүю сезімдерін дарыту мақсатын көздеді. Оған «Желтоқсан» қоры, облыстық дене шынықтыру және спорт басқармасы мұрындық болды. Жарыстың ашылу салтанатында мемлекеттік гимн ойналып, Желтоқсан боздақтары рухына тағзым етілді. Республикалық «Желтоқсан ақиқаты» қоғамдық ұйымы жергілікті бөлімшесінің төрағасы Боташ Қажымов, марқұмның ағасы Нұрлан сөз сөйлеп, ақиқатынан гөрі ақтаңдағы басым кезең жайлы, желтоқсаншылардың ерлік істері туралы ой тербеді.
Соңынан өңірдің әр жерінен жиналған 18 команда екі топқа бөлініп, жарысты қыздырды. Нәтижесінде, үздік ойын өрнегін көрсеткен бірыңғай жинақтаушы зейнетақы қоры мекемесі, «Әл-Фараби» лицейі, облыстық ішкі істер департаменті және «Остров» командалары финалдық сайысқа жолдама алып, негізгі тартыс осы төрттіктің арасында өрбіді. Азулы қарсыластың бірі саналған Петропавл классикалық гимназиясын 2:0 етіп тізе бүктірген тәртіп сақшыларының бәйгені шаппай алатыны туралы болжам расталмады. Олардан әлфарабиліктер басым түсіп, бірінші орын алды. Островтықтарды ұтқан зейнетақы қорының сайыпқырандары үшінші орынға жайғасты.
Жеңімпаздар мен жүлдегерлерге құрмет грамоталары, ескерткіш медальдар, бағалы сыйлықтар табыс етілді.
– Қазір Астанада жұмыс істеймін. Биыл өзім оқыған «Әл-Фараби» мектеп-лицейі командасы сапында өнер көрсетуге бел байладым. Мәселе марапатта емес. Ең бастысы – Тәуелсіздік үшін өшпес із қалдырған өндірдей жастар қандай құрметке де лайық екенін сездіру. Сонымен қатар, М. Қозыбаев атындағы Солтүстік Қазақстан мемлекеттік университеті құрамында бұл турнирге талай жыл қатысқан әкемнің жолын жалғастыруды жөн көрдім, – дейді елордадан арнайы келген Дулат Рсатаев.
Өмір ЕСҚАЛИ,
«Егемен Қазақстан»
ПЕТРОПАВЛ