Облыс орталығындағы С.Торайғыров атындағы мемлекеттік университеттің «Foundation» факультетіне білім алуға 2014 жылдың қазан айында 50 тыңдаушы жас келсе, биылғы оқу жылында даярлық бөліміне 78 тыңдаушы қабылданыпты. Ал «Дүниежүзі қазақтары қауымдастығы» республикалық қоғамдық бірлестігі облыстық филиалы өткізген кездесуде Қытай, Моңғолия және Өзбекстаннан келген студент жастар оқу бітірген соң ата-бабаларының қасиетті жерінде қалып, қызмет етіп, ұрпақ өсіруді мақсат ететіндерін айтты.
Жалпы, «Foundation» факультеті 2012 жылдың қыркүйегінде Болон үдерісінің негізінде жаңа форматта білім беру бағытында құрылды. Факультет деканы Сәуле Кісембаеваның айтуынша, басты ерекшелігі – еліміз үшін бәсекеге қабілетті мамандар даярлау, білім алушыларды дайындық курстары арқылы кешенді тестілеуге даярлықтарын тереңдету, шетелдік қазақ диаспорасының өкілдерін, оралмандар мен шетел азаматтарына тілдерді оқыту, қазақстандық білімге бейімдеу.
2014 жылы білім алған тыңдаушылардың 29-ы еліміздің жоғары оқу орындарына түсіпті. Қазіргі кезде факультетте шетелдік қазақ студенттері, күндізгі дайындық курстағы тыңдаушылар, қашықтықтан білім алушылар, базалық сынып оқушылары, кешкі дайындық курстардың тыңдаушылары білім алады. Факультет Елбасының қолдауымен «Шетелде тұратын отандастарды қолдаудың мемлекеттік бағдарламасы» аясында ашылды. Бағдарлама қазақ диаспорасы өкілдері мен оралмандар үшін жалпы білімнің дайындық деңгейін арттыру мақсатында және оларға жоғары және орта кәсіптік оқу орындарына түсуге қажетті жағдайды жасау мақсатын көздейді.
Шетелден келіп білім алғысы келетін қазақ жастарын бауырмалдықпен қарсы алып, олардың өз елінде өгейсімей, ата-бабаларының жерінен өз орындарын тауып, атамекендерінде қалуларына С.Торайғыров атындағы университет пен «Дүниежүзі қазақтары қауымдастығы» республикалық қоғамдық бірлестігінің облыстық филиалы ерекше қызмет жасауда.
Фарида БЫҚАЙ,
«Егемен Қазақстан»
ПАВЛОДАР