Ақмола облысында ауа райының қолайсыздығынан, өткен тәуліктерде халықаралық, республикалық және жергілікті маңыздағы 20 бағыт бойынша автокөлік жолдары жабылды.
Әсіресе, қар аралас қатты дауыл «Көкшетау – Астана» күре жолында адым жерді көрсетпей тастаған. Алайда, полиция және төтенше жағдайлар тарапынан бірнеше мәрте ескертпе жасалғанымен, жүргізушілердің басым бөлігі сапарын жалғастырып, өздерін және жолаушыларды орасан зор қауіпке ұшыратуда. Басқа бағыттарда да осындай келеңсіздіктер орын алған.
Ақмола облыстық ІІД жергілікті полиция қызметі тәулік бойғы кезекшілік тәртібіне көшіріліп, жол-көлік оқиғаларының алдын алуға ықпал жасауда.
Барлық бағыттарда қосымша 40 пост және жол-патрульдік қызметінің экипажы құрылып, оған 200 қоғамдық қауіпсіздік өкілі жұмылдырылды. Осының арқасында, 3000-нан астам көлік қауіпсіз жерлерге шығарылған.
Бақберген АМАЛБЕК,
«Егемен Қазақстан»
Ақмола облысы