Сәбилерге тарту

Қайырымдылық көмек аясында Болат Өтемұратовтың «Асыл мирас» қайырымдылық қоры Алматыдағы Акушерлік, гинекология және перинатология ғылыми орталығына өмірлік маңызға ие жаңа жабдықтар табыстады. Атап айтар болсақ, қайырым­дылық қоры нәрестелерге ин­тенсивті терапия жасайтын бө­лімшеге 2 электрлік аспира­ция­лық сорғыны, орталықтан­ды­рылған медициналық газбен жабдықтау жүйесіне арналған қондырғыны, нәресте өкпесіндегі ауаны жасанды жолмен алмастыратын аппарат пен фототерапияға арналған 4 шамды табыс етті. – Бүгін біздің Акушерлік, гинекология және перинатология ғылыми орталығына табыс­тап отырған жабдықтар кешені шала туған нәрестелерге жоғары сапалы медициналық көмек көрсету, оларға күтім жасау үшін аса қажет. Ана мен бала өмі­­рі­нің денсаулығын сақтауға кішігірім болса да үлес қосып отырғанымызға қуаныштымыз және де бұл біз үшін үлкен құр­мет, – деді «Асыл мирас» қайы­рым­дылық қорының директоры Марат Айтмағамбетов. Иә, аталған орталық Қазақ­станда акушерлік-гинеколо­гиялық және перинаталдық қызметті үйлестіретін ғылыми-зерттеу, емдік, білім беретін жетекші ұйым болып табылады. Ғылыми орталықтың негізгі қызметі перинаталдық медицина, жоғары қауіп-қатер тобына жататын жүкті әйелдерді босандыру, әйелдердің репро­дуктивтік денсаулығын сақтау, перинаталдық және аналар арасындағы ауру-сырқау мен өлім-жітім көрсеткішін тө­мен­дету мәселелерін шешуге бағытталған. Орталықта жыл сайын 7 мыңнан аса емделушіге, соның ішінде жоғары қауіп-қатер тобына жататын 3 мыңға жуық нәрестеге медициналық көмек көрсетеді. Оңалту бөлімшесінде дене салмағы айрықша аз және жеткіліксіз 350-ге дейін нәрестеге ем жасалды. Республикада «Ана атанудың қауіпсіз жолы», «Нәрес­телерді оңалту», «Шала туған нәрестелерге күтім жасау» секілді тиімді көмек көрсету технологиялары ендірілуде. «Асыл мирас» қорының ар­қасында осы бағдарламаның нәтижелі қызмет көрсетіп, жүз­деген баланың өмірін аман сақтап қалуға көмектесетін жаңа жабдық сатып алынды», деді баспасөз мәслихатында Аку­шерлік, гинекология және перинатология ғылыми орталы­ғының директоры, медицина ғылымдарының докторы Ләззат Ақтаева. Айта кету керек, Болат Өте­мұ­ратовтың «Асыл мирас» қайы­рымдылық қорының негізі 2014 жылы қаланған. Қордың мақсаты – бала мен оның отбасы­ның өмір сүру сапасына, тұл­ға болып қалыптасуына және соның нәти­жесінде бүкіл мемлекетіміздің табысты дамуына үлес қосу. Гүлзейнеп СӘДІРҚЫЗЫ, «Егемен Қазақстан» АЛМАТЫ