Астана қаласының халықаралық әуежайында орналасқан шекара бақылау-өткізу бекетінің шекарашылары 32 сұңқарды заңсыз жолмен әкетуге тырысқандарды ұстады.
Нақтырақ айтқанда, «Астана – Шаржы» бағытымен ұшқалы тұрған G9-252 рейсіне жүк тиеу жұмыстары жүргізіліп жатқан кезде шекарашылардың назарын қомақты 4 сөмке еріксіз аударды. Ол сөмкелердің тіркеу «жапсырмаларының» (бирка) жоқ екендігі байқалды. Шекарашылар сөмкелерді ашып, тексеру керектігін талап етті. Ал тексеру кезінде сөмкелерден бір емес бақандай 32 сұңқар шыға келгенде, тұрғандардың таңданысында шек болмады. Қазіргі бағамен олардың орташа құнын есептегенде артық-кемі жоқ 380 000 000 теңгеден асып жығылды. Аталған жыртқыш құстар әлемде сирек кездеседі, деп хабарлады ҰҚК ШҚ баспасөз қызметі.