Акция қорытындылары бойынша өңір тұрғындары 14 млрд 248 млн 722 мың теңгеге 3967 жылжымайтын мүлік нысанын жария етті, деп хабарлады ШҚО Ақпарат орталығы.
«Осы акция тіркелмеген үйлер мен саяжайларды, коммерциялық нысандарды заңдастыруға, салық салудан жасырылған және «көлеңкелі айналымға» әкетілген мүлік пен қаражатты ұсынуға жақсы мүмкіндік болды. Осы ретте заңдастыру субъектілеріне заңдастырудың барынша оңайлатылған, қолжетімді тәсілдері және бірқатар кепілдіктер берілді», - делінген хабарламада.
Жүргізілген жария ету қорытындылары осы акцияның артықшылықтарын негізінен тіркелмеген мүлкін заңдастырған жеке тұлғалар пайдаланғанын көрсетті. Жалпы облыс бойынша екі жылдан астам уақыт ішінде 6647 өтініш берілген.
Шығыс Қазақстанда жалпы құны 14 млрд 248 млн 722 мың теңгені құрайтын 3967 жылжымайтын мүлік нысаны жария етілген, соның ішінде 1302 тұрғын үй, 2375 үй мен саяжай, 283 коммерциялық нысан.
30 желтоқсанға дейін комиссияның қарауында жылжымайтын мүлікті жария етуге арналған 1914 өтініш бар.
Еске сала кетейік, Қазақстанда мүлік пен капиталды жария етуге құжаттарды қабылдау аяқталды.