Кеше «Барыс» Құрлықтық хоккей лигасының тұрақты чемпионатында Мәскеудің «Спартак» командасын қабылдап, 3:0 есебімен жеңіске жеткен. Бұл кездесуде астаналықтар өз қақпасын голдан аман сақтап, 2014/2015 маусымындағы рекордын қайталады.
Айдын иелері бұл маусымның 7 кездесуінде осындай көрсеткішке қол жеткізіп отыр.
Айта кетейік, мәскеуліктерге қарсы матчта Кори Тривино 6-минутта есеп ашса, 32-минутта Найджел Доус мергендігімен көзге түсті. Кездесудің аяқталуына санаулы секундтар қалғанда үздік хоккейшілердің бірі Дастин Бойд соңғы нүктені қойды.
45 ойында 68 ұпай жинаған «Барыс» Шығыс конференциясында әзірге 6-орында келеді. Келесі кездесуін ертең Астанада «Сочи» ұжымына қарсы өткізеді.