Қазіргі заман тарихын құжаттандыру орталығында «ХІХ ғасыр мен ХХ ғасырдың басындағы Шығыс Қазақстандағы халыққа білім беру саласының дамуы» атты екі томдық құжаттар жинағының тұсаукесері өтті. Аталған орталықтың бөлім меңгерушісі Лаура Қадырова оқырмандар назарына ұсынылған жаңа жинақ жайлы былай деді:
– Бұл жинақ екі томдық кітап болғандықтан, біріншісіне Қазан төңкерісіне дейінгі кезеңді қамтыған 218 құжат кіріп отыр. Екінші томда 1917-1940 жылдарды қарастырған 230 құжат бар. Бұл екі томдық кітапта Семейдегі түрлі оқу орындарының тарихы толық қамтылған. Халықтық оқу-ағарту саласы бойынша қандай жұмыстар атқарылды, міне, осының барлығын енгізуге тырыстық. Жинақты шығару үшін «Семипалатинские областные ведомости» және «Семипалатинский листок» деп аталатын көне газет сандары пайдаланылды. Сондай-ақ, Семей архивінің қорынан материалдар алынды. Сол сияқты Ресейдің Омбы, Том қалаларына барып, көптеген құжаттарды жинастырып келдік.
Раушан НҰҒМАНБЕКОВА,
журналист
СЕМЕЙ