Жоғары хоккей лигасындағы Қазақстанның қос клубы жанкүйерлерін қуантудан танбай келеді. Бұрнағы күні өткен турда Өскеменнің «Торпедосы» «Ермак» (Ангарск) командасын 6:2 есебімен ойсырата ұтса, Қарағандының «Сарыарқасы» өз айдынында «Соколдан» (Красноярск) басым түсті. Есеп – 3:2.
«Торпедо» мен «Ермак» командалары арасындағы кездесуде Джордон Сауторн, Владимир Коротков, Евгений Рымарев, Талғат Жайлауов және Александр Архипов сынды өскемендік хоккейшілер гол соғып, ортақ жеңіске сүбелі үлес қосты. Ал қонақтар тарапынан Артурс Озолиньш пен Сергей Леснухин «Торпедо» қақпасынан саңылау таба білді.
Осы жеңісінен кейін шығысқазақстандық клуб ұпай санын 100-ге жеткізіп, турнир кестесінде жеке-дара көш бастап келеді. Қазіргі таңда олар өздерінің қыр соңынан қалмай келе жатқан «СКА-Нева» (Санкт-Петербург) командасынан төрт ұпайға ұзап кетті.
Келесі ойынын «Торпедо» 13 ақпан күні өз айдынында «Буран» (Воронеж) хоккей клубымен өткізеді.
Қайрат ӘБІЛДИНОВ, «Егемен Қазақстан»