Қазақстан Сыртқы істер министрлігінің ғимаратында ЭКСПО-2017 көрмесінің комиссары Рәпіл Жошыбаев Кения Сауда министрлігінің бас хатшысы – Кенияның ЭКСПО-2017 көрмесіндегі ұлттық секциясының комиссары Кристофер Киптоомен кездесті, деп хабарлады Қазақстан Сыртқы істер министрлігінің баспасөз қызметі.
Кездесу барысында Кенияның Астанада өтетін көрмеге қатысуы мен ұлттық күндерін өткізуі, сондай-ақ, павильонды контенттік тұрғыда толтыру мәселелері сөз болды. Бұдан бөлек, тараптар ЭКСПО-2017 алаңы екі елдің арасындағы екіжақты қарым-қатынастарды дамытуға және тауар айналымын арттыруға серпін беретіндігін атап өтті.
Кения комиссары өз кезегінде Қазақстан мен Кенияның сауда-өнеркәсіп палаталары арасындағы ынтымақтастық туралы меморандумға қол қойылуына зор маңыз берілетіндігіне назар аударды. Сондай-ақ, К.Киптоо көрме барысында Кения өзінің балама энергия көздері саласындағы, оның ішінде, күн энергетикасын пайдаланудағы жетістіктерін көрсететіндігін жеткізді.
Кездесуде белгілі болғандай, 2017 жылы Кения 81 га жерді қамтитын, қуаты 50МВт-ты құрайтын күн фотоэлектрлі электр стансасын іске қосуды жоспарлап отыр. Сонымен қатар, Кения кен орындарынан алынатын отын түрлерін пайдаланудан бас тартып, 2050 жылға қарай 100 пайыз жаңғыртылатын энергия көзін пайдалануды мақсат етуде.
Кездесу соңында Р.Жошыбаев пен К.Киптоо Кенияның ЭКСПО-2017 халықаралық мамандандырылған көрмесіне қатысуы туралы шартқа қол қойды.