Константин Володенко жасаған ұрлық орта дәрежелі қылмыс түріне жатады. Оның қасында көмекшілері болған. Яғни, ол қылмысқа топтанып барыпты. Қаладағы №2 соттың отырысында К.Володенконың амнистияға ілінгендігі туралы шешім шығарылды. Ол бір емес, бірнеше автомобильдің аккумуляторларын ұрлапты.
Сыбайластары ең алдымен кімде қымбат көлік бар, соны аңдып, ақпарат жеткізген. Ал олар тонауларын түн мезгілінде жүзеге асырып отырған. Ал ұрланған аккумуляторларды алыпсатарларға өткізіп келіпті. Сөйтіп жүргенде, К.Володенко қолға түсіп қалады. Көлік ұрлаушыларға Қылмыстық кодекстің 175-бабы бойынша, яғни бөтеннің мүлкін тонау, топталып барып қылмыстық әрекеттерге бару істеріне қарай айып тағылған.
Бірақ, оның жасаған қылмысы орта дәрежелі болғандықтан, ел Тәуелсіздігінің 25 жылдығына орай «Қазақстан Республикасының рақымшылық туралы» Заңына ілігіпті. Сөйтіп, №2 соттың судьясы Жанат Әбенова барлық мәселені заң бойынша бүге-шігесіне дейін тексеріп, толық қарап, Константин Володенконың ісін амнистияға жатқызды.
– Мен өз жасаған ісіме өкінемін, – деді К.Володенко сот отырысында. – Отбасымды асырауға ақшам жетпеді. Содан кейін ұрлыққа бардым. Қазірде Затон аудандық полиция қызметкерлері менің слесарь болып жұмысқа орналасуыма мүмкіндік жасады. Елбасымыз Нұрсұлтан Назарбаевқа үлкен рахмет. Менің қатемді түзетіп, адам болуыма мүмкіндік берді. Темір тордың ар жағына түспеуіме жағдай жасады. Енді ұрлық жасамаймын.
Судья Жанат Әбенованың айтуынша, рақымшылық туралы заң кіші және орта дәрежелі қылмыс жасағандарға үлкен жеңілдік береді. Қарамағында кәмелетке толмаған баласы бар әйелдер, жаңғызілікті аналар, екіқабат әйелдер, барлық топтың мүгедектері, Ұлы Отан соғысы ардагерлерінің балалары да осы рақымшылық жасау туралы заңға ілініп, қайырын көріп отыр.
Раушан НҰҒМАНБЕКОВА
Семей