Мониторинг қорытындысын жариялады

Астанада Қазақстанның Аза­маттық альянсы Халыққа қызмет көрсету орталық­тары­ның (ХҚКО) жұмыс тәртібіне жүргізген мониторинг қоры­тын­дысын жария­ла­ды.  Мониторингті өткізудегі бас­ты мақсат – ХҚКО-ның қызмет көрсету сапасын және көрсе­тілген қызмет түрлеріне тұ­тынушылардың қанағат­танар­лық деңгейін анықтау болатын. Мониторинг қорытындысы «mystery shopping» әдісі бо­йын­ша ХҚКО-ның қызметкер­лері мен орта­лыққа келушілер арасында сауалнама жүргізу, сонымен қатар бақылаушы­лардың бағалауы нә­ти­жесінде шығарылған. Енді негізгі нәтижелерге тоқ­талар болсақ, мониторингке қа­тысушылардың денін ХҚКО жұ­мы­сы қанағаттандырады екен. Әсіресе, ХҚКО-ның ин­фрақұ­рылым сапасы мен қыз­мет­кер­лердің қызмет көрсету мәдениеті ортадан жоғары деңгейде тұрақты бағаланған. ХҚКО-ға келуші­лердің 76 пайызы орталық жұ­мысына көңілдері толатынын ай­тады. Ал бұл көрсеткіш өткен жылы 65 пайызды құраған-ды. Десек те, жекелеген критерийлер бойынша еліміз аймақтарының орталық бөлімшелері және фи­лиалдарындағы көрсеткіш­тер­де бірқатар алшақтықтар бар көрі­неді. Мониторинг нәтиже­сінде алынған барлық ақпа­ратты сараптай келе, Тараз, Қостанай және  Көкшетаудың ХҚКО-лары жоға­ры бағаға ие болса, Ақтөбе, Ақ­тау, Орал және Шымкенттегі халыққа қызмет көрсету орталық­тарының жұмысы төмен ба­ғаланған. Мониторинг жүргізу үшін таңдалған орталықтардың қа­та­­рына жаңа пилоттық ХҚКО (Астана қаласы, Мирзоян кө­шесі, 35-үй) іліккен-ді. Статис­тикалық көрсеткіштер келу­шілердің басқа ХҚКО-мен салыстырғанда, бар­лық критерийлер бойынша атал­ған орта­лықтың жұмысын жоға­ры бағалап отыр десек, осы ретте құжат қабылдайтын терезелер­дің саны, азаматтардың кезек күту уақыты, қызметкерлердің біліктілігі мен ХҚКО инфра­құры­лымдары және өзге де критерийлер бағаланған. Жал­пы алғанда, қорытынды негізінде ХҚКО ин­фрақұрылымы жақсы деген дең­гейде айтылуда. Орталық жұмысын баға­лауда төмен баға алған кри­терийлердің бірі – құжат тапсыру мен қабылдау опера­циялары кезінде азаматтардың кезекті ұзақ күтуі деуге бо­лады. Әсіресе, Ішкі істер министрлігінің Көші-қон поли­циясы көрсететін қызметтерді алушылар кезекті тиісті уақы­тынан ұзақ күтеді екен. Бұл жерде қызмет көрсету уақыт­тарының созылып кетуі бірнеше фактор­ларға байланысты екенін айтқан абзал. Соның бірі, құжаттандыру функция­сының Әділет министрлігінен Ішкі істер министрлігіне беру кезіндегі ұйымдас­тыру­шылық іс-шараларына қатысты болып отыр. Мұндай параметрдің негізгі құраушысы «қызметті күту уақыты» болса, жалпы қызмет көрсету уақыты қана­ғат­танарлық деп бағаланған. Тұтынушылар ұзақ күтетін қызмет түрлері қатарына «жерді пайдалануға берілетін мемлекеттік акт», «жеке куәлік пен паспорт беру», «аза­мат­тарды тіркеу» қызметтерін жатқызуға болады. Мониторинг қорытындысы бойынша сарапшылар ХҚКО жүктемесі бірдей емес деген тоқтамға келген. Ресурстардың жетіспеушілігі – сапа стандарт­тарын сақтамаудың бірден-бір себебі дейді олар. Сарапшылар ХҚКО-ға жүктелген жұмысты азайту үшін халық арасында үлкен сұранысқа ие қызмет­терді электрондық форматқа ауыстыру­ды ұсынып отыр. ХҚКО мониторингі Еуропалық одақ делега­циясының қаржы­лық қолдауымен Қазақстанның Азаматтық альян­сының «Қо­ғам­дық мониторинг» жобасы аясында Байланыс және ақ­парат министрлігімен бірлесіп іске асырылуда. Әбдірахман ҚЫДЫРБЕК.