Сенім мен серпін ұштасқанда ұтымды

Петропавл қаласында Президент жанындағы Әйелдер істері және отбасылық-демографиялық саясат жөніндегі ұлттық комиссияның ұйымдастыруымен «ЕАЭО аясында әйелдердің шекаралық экономикалық ынтымақтастығының басымдықтары» тақырыбында шекара маңындағы аймақтар әйелдерінің форумы өтті. «25 игі іс» акциясы шеңберінде ұйым­дастырылған шара Ел Тәуелсіздігінің ширек ғасырлық мерейтойына арналды. Форумның күн тәртібінде Қазақстан мен Ресей шекарасы аумағында жаңа байланыстарды нығайту, туризмді дамыту, «ауылдан ауылға» жобасы бойынша елді мекен кәсіпкерлері арасындағы іскерлік қарым-қатынасты өрістету секілді мәселелер талқыланып, Ресейдің Қорған, Омбы, Түмен, еліміздің Ақмола, Қостанай, Пав­ло­дар, Солтүстік Қазақстан облыстарынан кел­ген ква­зи­мемлекеттік секторлар мен іскер топ­тар өкіл­дері бірқатар маңызды ой-ұсыныс­тар айтты. Алқалы жиынды Президент жанындағы Әйелдер істері және отбасылық-демо­графия­лық саясат жөніндегі ұлттық комиссия төрайы­мы­ның орынбасары, Парламент Мәжілісінің депутаты Елена Тарасенко кіріспе сөзбен ашып, ұлық мереке қарсаңында Парла­мент палата­ларының бірлескен мәжілісінде «Тәуел­сіздіктің 25 жылдығы Қазақстанның жетістіктері» Декларациясы қабылданғанын, онда еліміздің жеткен зор жетістіктеріне орынды баға берілгенін атап өтті. Форумға қатысушыларды аймақ басшысы Ерік Сұлтанов құттықтап, қазіргі уақытта Еуразиялық экономикалық одақтың Ұлы Жібек жолын жандандырудың шешуші буынына айналғанына тоқталды. Ресей Федерациясы елш­і­лігінің кеңесшісі Елена Лысенко, Пар­ла­мент Сенатының депутаты Ольга Перепечина, Ұлттық экономика министрлігі халықаралық экономикалық интеграция департаментінің директоры Ернар Бәкенов, Омбы қаласындағы «Сколиоз-диагностик» медициналық орталық директорының орынбасары Марина Степкина, Солтүстік Қазақстан облыстық әйелдер істері және отбасылық-демографиялық сая­сат жөніндегі комиссияның жетекшісі Анархан Дүйсенова, тағы басқа шешендер өз сөз­деріне ЕАЭО аясында көрші елдердің ұлттық эконо­ми­ка­сын дамытуға серпін беру, шағын және орта бизнес секторында әйелдердің үле­сін арт­тыру, гендерлік саясаттың басым­дық­тарын тиім­ді пайдалану, жаңа экономикалық мүм­кін­дік­тер өрісін кеңейту мәселелерін арқау етті. Осымен елімізде үшінші рет өтіп отырған форумда Қазақстан мен Ресей арасындағы тауар айналымы жақсарып келе жатқаны айтылды. Былтыр оның мөлшері 17 миллиард АҚШ долларын құрап, 26 пайызға ұлғайған. Соңғы он жылда 10 миллиард доллар инвес­тиция құйылған. Көңіл қуантарлық басқа да мысалдар молынан келтіріліп, бизнес, кәсіп­керлік салаға әйелдердің қосып отырған үлесі­не жоғары баға берілді. Панельдік сессияларда әрқилы тақырыптар қозғалып, форум қорытындысы бойынша екі­жақ­ты уағдаластықты бекіткен қарар қабыл­данды. Өмір ЕСҚАЛИ, «Егемен Қазақстан» Солтүстік Қазақстан облысы