Минскідегі «Победа» кинотеатрында Қазақстан Республикасының Тұңғыш Президенті күні мен Тәуелсіздіктің 25 жылдығына орай «Қазақстан киносының апталығы» ұйымдастырылды.
Мәдени іс-шараға Ұлттық жиналыстың депутаттары, Минскіде аккредиттелген дипломатиялық өкілдіктердің басшылары, ТМД атқару комитеті мен Беларусь Президенттік кітапханасының өкілдері, ғылым және мәдениет қайраткерлері, Қазақстанның Достар клубының мүшелері, студенттер, соның ішінде қазақстандық және қазақ диаспорасының белсенділері қатысты.
Іс-шараны салтанатты түрде Қазақстанның Төтенше және өкілетті елшісі Ерғали Бөлегенов ашып, еліміздің тәуелсіздік жылдарында жеткен жетістіктері Қазақстан Республикасының Тұңғыш Президентінің еңбегімен тікелей байланысты екенін атап өтті.
Беларусь Мәдениет министрінің орынбасары Ирина Дрига жиналған көрермендерді айтулы мерекемен құттықтап, осындай іс-шаралар екі мемлекет арасындағы достық байланыстар мен мәдени ынтымақтастықтың дамуына септігін тигізетінін айтты.
«Қазақстан киносы апталығының» ашылу салтанатында «Жұлдыздар тоғысқанда» фильмі көрсетілді. Мәдени іс-шара барысында Қазақстан Президенті Н.Ә.Назарбаевтың өмірбаяны мен саяси қызметін баяндайтын «Елбасы жолы» киноэпопеясының барлық бес фильмі, сонымен қатар, режиссер Ақан Сатаевтың «Анаға апарар жол» және «Жаужүрек мың бала» фильмдері көрсетілді.
Айта кететін жайт, Қазақстан Республикасының Тұңғыш Президенті күніне орай ұйымдастырылған іс-шаралар басқа да мемлекеттерде өтті.