Бұдан бұрын бір ай уақыт бойы облыстың 5 ауданында болған республикалық топ құрамында 200-ден астам сарапшы, теолог, әртүрлі саладағы мамандар жұртшылықпен кездесулер өткізген еді. Олардың жұмысы аяқталғаннан кейін өңір басшысы «Халықтың қауіпсіздігін қамтамасыз ету» жобасын облыстың қалған жеті ауданы – Қобда, Мәртөк, Ойыл, Ырғыз, Қарғалы, Әйтеке би және Байғанин өңірлерінде жергілікті мамандардың күшімен жалғастыру жөнінде шешім қабылдаған болатын.
25 күн ішінде облыс бойынша құрылған топ мүшелері 54 мыңнан астам жергілікті тұрғынды қамтыды. Үстіміздегі жылғы 10 қарашадан 5 желтоқсанға дейінгі аралықта «Халықтың қауіпсіздігін қамтамасыз ету» жобасы аясында Әйтеке би, Байғанин, Ырғыз, Қарғалы және Қобда аудандарында 93 шара өткізілді. 4,8 мыңдай жұмысшыға, орта арнаулы оқу орындарының студенттеріне, мектептердің оқушылары мен мұғалімдеріне экстремизм идеологиясының зияндығы түсіндіріліп, Исламдағы Ханафи мазхабы рөлі ашып көрсетілді.
Оқу орындарының оқушылары мен оқытушыларына салафизм мен вахабизмге тыйым салып, колледждердің оқу бағдарламасына экстремизм мен терроршылдықтың алдын алу үшін дінтану пәнін енгізу ұсынылды. Дәстүрлі емес діни ағымдарды ұстанушылармен кездесулер өткізіліп, олар радикалдарды өз бағыттарынан айнытуға ықпал етуге әзір екендіктерін білдірді. Төрт мыңдай ауыл тұрғыны «Есігімді қаққан кім?» спектаклін көрді.
Екінші бағыт – «Бизнес ортаны дамыту» бағдарламасы бойынша Ойыл, Әйтеке би, Байғанин, Ырғыз, Қарғалы аудандарында 3144 адамды қамтыған 71 шара өткізілді, 898 азаматқа кеңес берілді. Мәселен, Қарғалыдағы «Ысқақова М» ЖК екі шаштаразды «Жұмыспен қамтудың жол картасы-2020» бағдарламасы бойынша білім алу курсына жіберсе, шаруа қожалықтарының жетекшілері өз істерін дамытуға несие алу шарттары туралы кеңес алды.
Әлеуметтік проблемаларды шешу бағыты аясында Мәртөк, Ойыл, Әйтеке би, Байғанин, Ырғыз аудандарында 10904 адамды қамтыған 218 шара өткізілді, олардың 1428-іне көмек көрсетілді. Нақты айтқанда, 50 адам тұрақты жұмыс орындарына ие болды. Бұдан басқа, 15 қайырымдылық акциясы ұйымдастырылып, 73 адамға 1 миллион теңге көлемінде жәрдем жасалды. 93 аз қамтылған отбасы 2017 жылы «Өрлеу» жобасына қатысуға тілек білдірді.
5021 адам профилактикалық тексерумен қамтылды, облыстық емханаға 128 адам жіберіліп, 590 адам тұрғылықты жері бойынша емдеу алды, 13 адамға операция жасалды.
Төртінші бағыт — «Діни мәселелер» бойынша Әйтеке би, Байғанин, Ырғыз, Қарғалы, Қобда аудандарында 44 шара ұйымдастырылып, 4 мақсатты жұмалық намаз өткізілді, сондай-ақ, «Шәріп молда», «Әлия» аудандық мешіттерінің қызметі, имамдардың жұмысы зерттелді. «Мешіт тәртібі» тақырыбына имамдар мен мешіт қызметкерлері үшін семинар-тренинг ұйымдастырылды.
Алдағы уақытта бұл бағыттағы жұмыс жандана түсетін болады.
Сатыбалды СӘУІРБАЙ,
«Егемен Қазақстан»
Ақтөбе облысы