Оңтүстік Қазақстан облыстық опера және балет театрының белгілі солисі, мәдениет қайраткері Үралхан Сейілбекова ел Тәуелсіздігінің 25 жылдығына орай «Әнім саған, нұрлы елім!» шығармашылық кешін өткізді.
Соңғы жылдары отандық опера өнері небір жарқын есімдермен толыға түсуде. Роза, Бибігүл, Нұржамал, Майра сынды халқымыздың дара туған саңлақ жұлдыздары көшін жалғастырушы жастардың арасынан Ү.Каналбайқызының өнерін айрықша атап өткен жөн. Өйткені, ол өңірдегі опера және балет театрында басты партияларды сомдап жүрген бірден-бір солист. Халық Үралханның ашық тембрі мен жұмсақ дауысын жоғары бағалайды. Оның әсем вокалы, опералық және концерттік репертуарды таңдаудағы ойлы ізденістері, ол бейнелеген әрбір образ қазақ опера өнеріне өзіндік өрнек болып қосылуда.
Кештің жоғары деңгейде өтуіне қолдау білдіруге достары, түрлі сахналарда жұптасып өнер көрсетіп жүрген әншілер қонақ ретінде қатысты. Олардың арасында Өзбекстанның еңбек сіңірген артисі, танымал баритон Жеңісбек Пиязов, «Астана Опера» театрының жетекші солисі, Қазақстанның еңбек сіңірген қайраткері Дина Хамзина, Қазақтың мемлекеттік академиялық Абай атындағы опера және балет театрының солистері, халықаралық байқаулардың лауреаты Елена Никонова мен Эмиль Сақауов және облыстық опера және балет театрының солисі Ерлан Жандарбай бар.
Кешке қатысушылар опера жұлдызымен бірге ұлттық және әлемдік классиканың інжу-маржандарынан үзінділер шырқады. Халықаралық байқаулардың лауреаты, Абай атындағы опера және балет театрының дирижері, маэстро Ерболат Ахмедяровтың, облыстық опера және балет театрының бас дирижері Қуаныш Исмайыловтың жетекшілігімен театрдың симфониялық оркестрі мен Ш.Қалдаяқов атындағы филармонияның «Сүгір» ұлт-аспаптар оркестрі өнер көрсетті. С.Мұхамеджановтың «Шаттық Отаны» композициясы, Е.Рахмадиевтің «Қамар сұлу» операсынан Қамардың ариясы орындалды. Симфониялық оркестрдің сүйемелдеуімен ән шырқаған қыздар хоры мен балет труппасының өнері кеш ажарын ашты. Ұлттық классиканың «алтын қорынан» А.Жұбанов пен Л.Хамидидің «Абай» операсынан «Ажардың ариясы», М.Төлебаевтың «Қозы Көрпеш –Баян сұлу» операсынан «Баянның ариясы», «Біржан – Сара» операсынан «Айтыс», Е.Рахмадиевтің «Қамар сұлу» операсынан Қамар мен Ахметтің дуэті, Л.Хамидидің «Бұлбұл», Ш.Қалдаяқовтың «Ана туралы жыр» әндері, сондай-ақ, Вердидің «Виолеттаның ариясы», Ш.Гуноның «Ромео және Джульетта» операсынан «Джульеттаның вальсі», Л.Делибтің «Лакме» және Р.Леонковаллоның «Паяцы» операсынан «Недда мен Сильвио» дуэттері өте сәтті орындалды. Құрамында Эмиль Сақауов, Елена Никонова, Ерлан Жандарбай бар топпен бірге Дж.Вердидің «Риголетто» операсынан үзінді шырқалды.
Облыстық мәдениет басқармасының басшысы Н.Ахметжанов әншіге облыс әкімі Ж.Түймебаевтың және облыстық мәслихаттың алғыс хаттарын табыс етті. Ү.Сейілбекованың орындауындағы партиялардың қай-қайсысы да шоқтығы биік туындылар десек, ал, оның әсем әуезі мен кең тынысты ерекше үні көрерменін тез баурап әкетеді.
Индира АРТЫҚБАЕВА