Бокстан жартылай ауыр салмақта өнер көрсететін қазақстандық Әли Ахмедов 9 желтоқсан күні Польшада кәсіби рингтегі 5-ші жекпе-жегін өткізеді. Бұл туралы vesti.kz хабарлады.
Алғашында Әлидің қарсыласы латвиялық Эдуард Герасимовс (6-10-1, 6КО) болатыны, кейінірек Михал Герлецкимен (13-1-0) жекпе-жекке шығатыны хабарланған. Алайда, BoxRec сайтының мәліметі бойынша ол беларусьтік Владимир Харкевичпен жұдырықтасуы тиіс. Кездесу 6 раундтан тұрады.
Айта кетейік, Әли Ахмедов бұған дейін өткізген төрт кездесуін уақытынан бұрын аяқтаған. Сонымен қатар, қазақстандық боксшыға Сауль «Канело» Альварестің және Мэнни Пакьяоның промоутерлері қызығушылық танытып отырғаны хабарланған болатын.