Баспасөз мәжілісіне Ұлттық экономика бірінші вице-министрі Руслан Дәленов және Статистика комитетінің төрағасы Нұрболат Айдапкелов қатысты.
«Жарияланған жаңғыртудың үшінші кезеңі жаңа жоғары технологиялық саланы, барлық жерде инновацияларды қолдануды білдіреді. Цифрлы экономика дамиды, бұл жаһандық үрдіс. Және «жаңа экономика» статистиканы айналып өтпеуі тиіс. Сондықтан біз әдістемені заманауи халықаралық тәжірибе негізінде жетілдірудеміз. Сонымен қатар статистика сайтында жаңа «3.0 Жаңғырту» бөлімін ашамыз. Статистика Қазақстанның үшінші жаңғыртылуын есептейтін болады», деді Р.Дәленов.
Вице-министр статистиканың ағымдағы жұмыстары да қайта жаңартылатынын атап өтті. Сондай-ақ, енді цифрларды тұрақты негізде жан-жақты түсіндіріп, қосымша есеп әдістемесі де айтылмақ. Сонымен қатар, статистика сайтындағы барлық әдістемелер көрсеткіштердің қалай есептелетінін мысалдар арқылы ашып көрсететін болады. Бұл үшін көрнекілік толық есеппен арнайы айдар ашылмақ, бұл арқылы сенімділік пен кері байланыс артады деп көзделуде.
«Біз статистиканың әдістемесін жетілдіру үшін онлайн алаңы арқылы жаңа қарым-қатынас форматын дамытуға дайынбыз. Журналистерді, экономистерді, қоғамды, азаматтарды талқылауларға белсенді қатысуға шақырамыз», деді вице-министр.
Сөйтіп сайт барынша жаңартылып, оның мобильдік қосымшасы жасалмақ. Статистика сайтында сондай-ақ халық санын есептеуші, басқа да өзекті деректерді есептеуші, инфографика сияқты қызықты айдарлар пайда болады.
Қазақстанда цифрлы технологиялар мен интернетті қолдану арқылы құрылатын экономикалық қатынастар ауқымы ұлғайып келеді. Мысалға, қазақстандықтардың арасында ұялы байланысты пайдаланушылар саны − 97 пайызға, интернет пайдаланушылар саны 77 пайызға жеткен.
«Интернет арқылы жасалатын сатылымдар көбейді, онлайн-фильмдер көретін, электронды кітаптар оқитын, смартфондарына түрлі қосымшалар жүктейтін адамдар қатары артты», деді Р.Дәленов.
Ал қазіргі күні ірі халықаралық ұйымдар қазақстандық статистиканың деңгейін жоғары бағалайды. Бұл туралы Статистика комитетінің төрағасы Нұрболат Айдапкелов мәлімдеді.
Статистикалық ақпараттың дұрыстығы өзекті мәселелердің бірі болып саналады. Статистикалық тәжірибеде «жаһандық бағалау» ұғымы бар. Қазақстандық статистика жүргізіле бастаған кезеңнен бері осындай бағалау жұмыстары елімізде үш рет – 2003, 2008 және 2016 жылдары жүргізілген.
«2016 жылдың соңы мен 2017 жылдың басында бізді үш ірі халықаралық ұйым – БҰҰ Еуропалық экономикалық комиссиясы, Еуростат және Еркін сауда қауымдастығы бағалады. Соның нәтижесінде олар қазақстандық статистикада елеулі ілгерілеудің бар екенін айқындап, бізге Орталық Азия өңіріндегі көшбасшы атауын беріп, әдістеме бойынша тәжірибемен бөлісуге шақырды», деді Н.Айдапкелов. Жалпы, комитет төрағасының айтуынша, статистиканы 5 000-ға жуық көрсеткіш қалыптастырады. Еліміздің Статистика комитетіне есептер онлайн режімде және қағаз түрінде келіп түседі, комитет мамандары келген ақпараттарға талдау жасап, қажет болған жағдайда олардың дұрыстығын қайта тексереді.
Динара БІТІКОВА, «Егемен Қазақстан»