Алдыңғы буынның орасан тәжірибесі мен білімі ұрпақтар сабақтастығы негізінде алмасып, нәтижесінде халық денсаулығының жақсаруына, қоғамда саламатты өмір салтының қалыптасуына оң әсер етті.
Медицинаның маңыздылығын арттыру мақсаты мен сапалы қызметі туралы Елбасы Нұрсұлтан Назарбаевтың «Қазақстанның Үшінші жаңғыруы: жаһандық бәсекеге қабілеттілік» атты Жолдауында кеңінен айтылды. Сондықтан Гиппократ антына адалдық саланы дамытуға да соны серпін береді. Бүгінгі таңда жүрек-қан тамырлары ауруы әлемді алаңдатып отырған күрделі мәселе. Аталған кеселден көп жағдайда адамдардың көз жұматыны да шындық. Дегенмен, толыққанды медицинаның тетігін білетін білікті дәрігердің адам өмірін арашалап қалуда үлесі зор. Айталық, он жылдан бері жұмыс істеп келе жатқан «Тараз ғылыми-клиникалық кардиохирургия және транс- плантология орталығы» жа- уапкершілігі шектеулі серіктестігі бұл тұрғыда айтарлықтай жұмыс атқарып келеді. Кәсіпорынның бас директоры Сейітхан Жошыбаев жыл сайын жүздеген адамның жүрегіне ота жасап, әрбір науқастың жалғанның жарығын қайта көруіне септесіп отыр. Жалпы, Сейітхан Жошыбаев елімізге медицина ғылымдарының докторы, Қазақстан Республикасының еңбек сіңірген дәрігері ретінде белгілі. Қырғыз мемлекеттік медицина институтын және Мәскеу жүрек-қан тамырлары ғылыми-зерттеу институтының аспирантурасын тәмамдаған жас маман Қырғызстанның Нарын және Талас қалаларында дәрігердің ассистенті болып жұмыс істейді. Кейіннен Бішкек қаласындағы республикалық клиникалық ауруханада хирург, медицина институтының кафедрасында жалпы хирургия көмекшісі және кеуде, жүрек кафедрасының меңгерушісі қызметінде болды. Әулиеатаның Құлан өңірінде дүниеге келіп, туған жердің тылсымын сезініп өскен Сейітхан Жошыбаев сан қырлы еңбек жолынан өтіп, білікті маман ретінде туған елге оралады. Араға ширек ғасырға жуық уақыт салып Алматыға келген ол Сызғанов атындағы Жүрек-қан тамырлары институтының жетекшісі ретінде қызмет атқарады. Өзінің терең парасаты, бай тәжірибесімен даралана білген Жошыбаевтың жарқын жолы осы уақыттарда қалыптасады. Өзгенің жүрегіне өмір сыйлау үшін де үлкен жүрек керек. Әрдайым адалдығы мен адамдығынан жаңылмаған Сейітхан Жошыбаев отандық медицинада сара жолын салып қана қоймай, тәжірибе алмасу мақсатында Моңғолия, Венгрия, Германия, Үндістан, АҚШ, Англия, Канада, Польша, Чехия мемлекеттерінің арнайы мамандандырылған клиникаларында болды. Әлемді шарпыған жүрек-қан тамырлары ауруларын жеңудің жолын қарастырды. Ал аурудың алдын алуда және науқасты емдеуде өзінің өмір бойы жинаған тәжірибесін жас мамандарға көрсете білді. Бүгінде Тараз қаласында еңбек етіп жатқан медицина білгірінің әлі де өзінен кейінгі буынға үйретері көп. Талап талантқа жалғасып, еңбек табандылықтан жарасым тапса, онда мұның бәрі адамды тұлғалық биікке жетелейді. Ең бастысы, халық жүрегінде ақ халатты абзал жан ретінде қалған дәрігерлік міндетке де қажеті осы. Олар үшін өзгенің өмірін сақтап қалудан, өзгеге бақыт сыйлаудан артық бақыт болмаса керек. Ал адам баласын арман асқарына жетелейтін де, қиял бесігінде бөлейтін де жүрек атты алып күштің қуаты қашанда қымбат. Сейітхан Жошыбаев алға қойған мақсатына жеткен азамат. Елінің білікті маманы, ардагер азаматы ретінде де айтарлықтай табысқа жетті. Талай жылғы еткен еңбегі мен төккен терінің нәтижесі ретінде Елбасының қолынан еліміздің ең жоғары мемлекеттік марапаттары санатындағы ІІ дәрежелі «Барыс» орденін алуы да айтарлықтай белес еді. Бүгінде Сейітхан Жошы- баевты білмейтіндер кемде-кем. Жүрек дейтін алып қуатты жаратылысты бағындыра білген азамат талай адамға жарқын өмір сыйлаған ардақты адам ретінде танылды. Мамандық мәртебесін көтерген және сол мамандыққа адалдық таныта білген ардагер тұлға әлі де кеселдің жолын кесуде еңбектеніп жүр. Бір ғылым докторын және тоғыз ғылым кандидатын дайындаған ұлағатты ұстаз ретінде де шәкірттері мен халықтың ықыласына бөленді.
Хамит Есаман, «Егемен Қазақстан»
Жамбыл облысы