Өткен жылмен салыстырғанда екі есе көп бала қатысқан сайыс қазірдің өзінде оншақты жеңімпазды анықтап үлгерді.
Ақтаудағы Н.Жантөрин атындағы Маңғыстау облыстық музыкалық драма театрында өткен кастингке өңірдің барлық аудан-қалаларынан 7 мен 13 жас аралығындағы 100-ден астам бала қатысты. Бір күнге созылған іріктеу кезеңінің оңай болмағанын айтады ұйымдастырушылар. Додада өзінің талантымен, өзіне деген сенімділігімен, сахнаға деген бейімділігімен 7 жасар Әннұр Қуантқанов жүлдегер болып шықты. Мықтыны анықтауда қазыларға әншілерді ұзақ тыңдап, біраз пікір таластыруға тура келген. Нәтижесінде, барлық талаптарға сай деп танылған Әннұрдың бағы жанды. Әнші Әннұрдың әкесі бокс жаттықтырушысы, ал биге және актерлік шеберлік курсына қатысатын балақайды ән айту өнеріне, яғни вокалға үйде анасы дайындайды. Кастингке Маңғыстауға келген тәлімгер – әнші, Қазақстанның еңбек сіңірген қайраткері Толқын Забирова әнші балақайдың болашағына сенімді. − Ақтық сында Әннұрдың өз Маңғыстауының мәртебесін көтеріп, байқаудың кішкентай жарық жұлдыздарының бірі болатынына сенемін. Себебі оның бойында талант, әртістік қабілет, өз-өзіне деген сенімділік пен табандылық бар. Біз екеуміз ақтық сынға жүйелі дайындалатын боламыз, − деді Т. Забирова. 27-29 қазан аралығында «Алматы Арена» мұз сарайының сахнасында әр өңірдің жүлдегерлері өз тәлімгерлерімен бірге сайысқа түседі. Қиын сында талапкерлердің арасынан шын талантты кәсіби әншілер мен телекөрермендер анықтайтын болады.
Гүлайым Шынтемірқызы, «Егемен Қазақстан»
Маңғыстау облысы