ЭКСПО-2017 халықаралық көрмесінің ашылу салтанатына байланысты 10 маусымда Француз Республикасы павильонының ресми ашылуы өткен болатын. Кеше Франция павильонының Бас комиссары Паскаль Лоро халықаралық көрмеге тіркелген БАҚ өкілдерімен пресс-тур өткізді.
Франция павильоны ЭКСПО-2017 көрмесіндегі ең ірі павильондардың бірінен саналады. Оның жалпы аумағы 1084 шаршы метрді алып жатыр. Осы көрме алаңында француздың әлемге әйгілі 8 компаниясы мен стартаптары жаңғырмалы энергетика саласындағы озық жетістіктері мен инновациялық технологияларын паш етуде. Бұл реттегі олардың басты мақсаты – әлемдік қауымдастық назарын энергия тұтынудың үнемді үлгілерін пайдалану қажеттігіне аудару және климаттың өзгеру үрдісін тоқтатуға бағытталған шешімдерді ұсыну. Франция павильонының жәдігерлері негізінен 3 тақырыпқа топтастырылған. Олар: «Экологиялық қала», «Жаңғырмалы энергия» және «Экологиялық көлік». Осыған байланысты павильонның бірінші қабатындағы 7 бөлмеде көрме қонақтарына «жасыл» энергетика жетістіктері ұсынылған. Жоғарыда айтып өткеніміздей, Франция павильонының әріптестеріне француз өнеркәсібінің 5 көшбасшысы – Peugeot, Saint-Gobian, Total, Veolia, Vicat компаниялары, lter халықаралық жобасы, ADEME және Syctom мемлекеттік агенттіктері кіріп отыр. Франция павильонының аясында олар өздерінің озық жетістіктері мен инновациялық технологиялары арқылы энергетика саласындағы жаһандық сын-тәуекелдерге жауап ұсынады. Мәселен, Saint-Gobian компаниясының көрмедегі жәдігерлері арқылы ғимараттарда тұрғындар үшін қандай қолайлы жағдайлар жасалатындығы көрініс тапқан. Syctom – қоршаған орта мен экология проблемаларына байланысты тұрмыс қалдықтарын жинау және қайта өңдеумен айналысатын мемлекеттік агенттік болып табылады. Агенттік тұрмыс қалдықтарын қайта өңдеу арқылы жаңғырмалы энергия қуатын алу технологияларын да паш етеді. Бұл компания Париж қаласы мен оның аумағындағы елді мекендерде 6 млн халық тұратын аумақта күл-қоқыс пен тұрмыстық қалдықтарды жинап, қайта өңдеумен айналысады. Ол жылына 2 млн 300 мың тонна тұрмыстық қалдықтарды өңдеп, әртүрлі тұрмыстық заттар өндірумен бірге 300 мың тұрғындар қоныстанған үйлерді тұрақты жылумен қамтамасыз етеді. Vicat компаниясының павильонға қойған жәдігерлері арқылы бұдан 200 жыл бұрын ойлап табылған құрылыс материалы – цементтің жаңа технологиялар қолдану арқылы қандай пайда беретіндігі көрсетіледі. Компания жәдігерлері қойылған бөлмеге кірген қонақтар жасанды цемент ойлап тапқан француз өнертапқышы Луи Виканың бетоннан жасалған мүсінін көреді. Одан әрі бетонның «Болашақ қаласы» жобасы аясында қалай пайдаланатыны көрсетілген. Мәселен, тұтас үй қабырғасындай бетон плитасынан шыны сияқты келесі жақты көруге болады. Сонымен бірге, бетон қабырғада жасыл жапырақтар мен бұталарды да өсіруге болатындығы нақты тәжірибемен көрсетілген. Peugeot – әлемдегі экологиялық көлік шығаратын көшбасшы компания болып табылады. Peugeot компаниясының жәдігерлері қойылған бөлме өз уақытының озық тұлғасы болған француз кәсіпкері Арман Пежоның өмірі және қызметіне байланысты деректермен ашылады. Француздың әйгілі компаниясы 1955 жылдан бері электр көлігін жетілдіру жұмысымен айналысып келеді. Бүгінде компанияның экологиялық көлік ретінде ұсынатын өнімдерінің қатарында әлемге танымал электр велосипедтері, электроскутерлер, жеңіл және жүк электр автомобильдері бар. Павильондағы экологиялық көлік бөліміне қойылған Peugeot компаниясы шығаратын 270 аттың күші бар, 4 цилиндрлі двигательмен жабдықталған гибридті автомобиль келушілердің назарын еріксіз өзіне аударады. Еуразия аймағындағы PSA тобының бас директоры, Peugeot компаниясының атқарушы вице-президенті Кристоф Бержеранның айтуынша, аталмыш компания әлемдік нарықта экологиялық қауіпсіз көлік және көлік құралдарын шығаратын жетекші компания болып табылады. Алдағы уақытта бұл компания өз жұмысын заман талабына сай жетілдіре беретін болады.
Лоро ПАСКАЛЬ, Франция павильонының Бас комиссары:
Қазақстанның бас қаласы – Астанада өтіп жатқан ЭКСПО-2017 халықаралық көрмесі соңғы кезде өткізілген көрмелер ішіндегі үздік шара болатындығы қазірдің өзінде белгілі болып отыр. Қазақстан бұл халықаралық ауқымды шараға зор жауапкершілікпен және үлкен әзірлікпен келді. Тарихи қысқа мерзімнің ішінде ЭКСПО көрмесі үшін заманауи технологиялармен жабдықталған болашақ қаласы бой көтерген. Президент Нұрсұлтан Назарбаевтың дара басшылығының арқасында Қазақстан әлемде зор беделге ие болды. ЭКСПО көрмесі Қазақстанның беделін бұрынғыдан да көтеретін болады. Франция павильоны ЭКСПО-2017 көрмесіндегі ірі де іргелі павильондарының бірінен саналады. Біз мемлекетіміздің павильонын жабдықтау мақсатында үлкен жұмыс атқардық. Біздің павильон энергетика саласындағы еліміздің жетекші кәсіпорындарының бүгінгі жетістіктері мен озық технологияларын паш етеді. «Астана ЭКСПО-2017» көрмесі аясында біз өзіміздің инновациялық технологияларымызды таныстыра отырып, жаңғырмалы энергетика саласындағы тәжірибемізді одан әрі дамытуда мол мүмкіндіктерге қол жеткіземіз деп ойлаймын.
Жылқыбай ЖАҒЫПАРҰЛЫ, «Егемен Қазақстан»