Манитоба провинциясының астанасы Виннипег қаласында өткен іс-шараға Қазақстан Республикасының Канададағы елшісі Константин Жигалов, Манитоба Мәдениет министрі Рошель Сквайерс, Қаржы министрі Камерон Фризен, провинция Парламентінің депутаттары және шамамен 400-дей қоғам қайраткері қатысты.
Қатысушылардың алдында сөйлеген сөзінде К.Жигалов кітап авторын Қазақстанның тарихы мен мәдениетін сәулет тұрғысынан зерттеген ғылыми жобаның сәтті аяқталуымен құттықтай келіп, Канада тарихында Қазақстанға арналған алғашқы кітаптың 2017 жылы басып шығарылуының ерекше маңызын атап өтті. «Биылғы жылы Қазақстан мен Канада арасындағы дипломатиялық қарым-қатынастарға − 25 жыл, Президент Н.Ә.Назарбаев бас архитекторы болып саналатын Астана қаласының елорда болуына 20 жыл толып отыр. Бұл кітап ЭКСПО-2017 халықаралық мамандандырылған көрмесінің ашылуы қарсаңында жарық көруде. Профессор Франк Альбо кітаптың жеке бөлігін соған арнап отырғаны белгілі», – деді К.Жигалов. Сонымен қатар, Қазақстан елшісі тыңдаушыларды еліміздің әлеуметтік-экономикалық дамуы, сондай-ақ, еліміздің жаңғыртылуының басты қадамдары туралы жан-жақты хабардар етті. Мемлекет басшысының бастамасымен іске асырылып жатқан қоғамдық сананы жаңғырту және «Туған жер» бағдарламасы аясындағы «Қазақстанның киелі жерлері» жобасын ескере отырып, автор көтерген тақырыптардың өзектілігіне де ерекше назар аударды. Канада жұртшылығы «Астана: сәулеті, жұмбағы, тағдыры» кітабына қызығушылық танытып, қазіргі кезде оның алғашқы тиражы (4500 дана) толығымен сатылды. Кітап Канаданың ресми бестселлері атағына ие болды. Ф.Альбо іс-шараға жинаған жұртшылықты кітаптың ресми сайты (www.astanamyth.com), «АТОМ» жобасымен бірге іске асырылып жатқан ядролық қаруға тыйым салу жөніндегі онлайн науқан, сондай-ақ, алдағы уақытта Лондон, Вашингтон, Оттава қалаларында және Астанадағы ЭКСПО-2017 көрмесі шеңберінде арнайы тұсаукесер ұйымдастыру туралы өз жоспарларымен таныстырды, деп хабарлады еліміздің Сыртқы істер министрлігінің баспасөз қызметі.