Барабаншылар шеруі келушілерді баурады

«Болашақ энергия­сы» тақырыбындағы ЭКСПО көрмесінде Израиль «Жасам­паздық энергиясы» ұра­нын ту еткен. Бұл – израиль­дік­тердің білімімен, креативті дағдыларымен және құштар­лығымен үндескен «Болашақ­тың энергиясы». Қазіргі таңда Қазақстан мен Израиль медицина, агроөнеркәсіп кешені салаларында жоғары технологияларды пайдалану мәселелері бойынша ынты­мақтастық орнатқан. Бола­шақ­та қос мемлекет «жасыл энергетика» саласында ауқымды жобаларын жүзеге асырмақ. «Қазақ елі керемет жұмыс атқарды. Мен Қазақстан үкі­меті мен «Астана ЭКСПО-2017» ұлттық компания­сын осы идеяны жүзеге асыруы­мен құт­тықтаймын. Көрме аяқ­тал­ған соң да ол көп уақытқа дейін естен шықпай­тыны анық. ЭКСПО көптің аузынан түспейтіні хақ. Мен үшін израильдік делегация­мен бірге көрмеге қатысудың өзі үлкен мәртебе», деді Израиль Сыртқы істер министрлігінің бас директоры Юваль Ротем. Салтанатты жиында қазақ­­стандық Қаржы вице-министрі Қанат Баеділов қос мемлекет арасындағы дип­ломатиялық қарым-қатынасқа 25 жыл толғанын айтты. Оның мәліметінше, екі ел ара­сын­дағы өзара тиімді ын­ты­мақ­тастық сенім мен дос­тық­қа негізделген. «Қазіргі таң­да «Бола­шақ энергиясы» – әлем­дік деңгейдегі өзекті тақы­рып. Израиль – медицина мен инно­вациялық технология­лар саласында алдыңғы орында тұрған ел. Біз үшін осы сала­дағы Израиль тәжірибесі аса құн­ды және олардың бізбен тәжі­рибе алмасуға дайын болуы ерекше қуантады», деді ол. Израиль павильоны көрме аяқталғанға дейін қонақтарын түрлі мәдени шараларымен таңғалдырмақ.