Қол қойылған құжат Қазақстан қор биржасы мен Алматы қаласының өңірлік қаржы орталығының өзара тиімді, әрі ұзақ мерзімге қоян-қолтық қызмет етуіне септеседі. Және бұл мәміле KASE интернет-ресурсында АӨҚО РА ақпараттық және талдамалық материалдарын жариялау арқылы, сондай-ақ, KASE тізіміне кіретін компаниялардың несиелік рейтингтері туралы мәліметтерін жариялау арқылы жүзеге асырылады.
«Қор нарығын дамыту маңызды бағыттардың бірі. Бұл ел эономикасының тиімділігін арттыруға ықпал етеді. Қазірдің өзінде Қазақстан қор биржасы әмбебап қаржы алаңына айналып, нарыққа қатысушылар сауда-саттық алаңында жасалатын тәуекелдердің түбі қайырлы болуына мүдделі. Қашықтан берілген рейтингтер болжамды тәуекелдер туралы белгілі бір түсініктің пайда болуына көмектеседі. Бірақ ендігі жерде ұлттық несиелік рейтингтерді жариялап отыру қазақстандық листингілік компаниялар үшін тұрақты тәжірибеге айналып, осы бағытта әрі қарай жылжуға жол ашады», – деді «Қазақстан қор биржасы» АҚ басқарма төрағасының орынбасары Наталья Хорошевская.
Өз кезегінде «Алматы қаласының өңірлік қаржы орталығының рейтинг агенттігі» АҚ басқармасының төрайымы Айгүл Тасболат халықаралық шкаламен қатар, ұлттық шкала бойынша рейтингтер беру – дүниежүзі бойынша инвесторлардың тәуекелдерін басқару тиімділігін арттыруға көмектесетін және несиелік тәуекелді бағалаудың эталоны болып табылатындығын атап өтті.
Айнаш ЕСАЛИ, «Егемен Қазақстан» АЛМАТЫ