Қазіргі таңда Астана маңында 80 мыңға жуық гектар жерге ағаш отырызылған. Ал елорданың «жасыл белдеуінің» жалпы көлемі 15 мың гектарға жуықтады. Астанамен бірге қалыптасып, бірге бой көтерген «жасыл белдеуге» жылда қала күні қарсаңында баруды Елбасы жақсы дәстүрге айналдырған. «Жыл сайын елорданың аумағында орман шаруашылығын дамыту бойынша тапсырманың қаншалықты орындалып жатқанын тексеріп, қараймын. Бұған дейін біз орманның батыс аумағына отырғызылған көшеттерді көрсек, бүгін бұл үрдіс орманның шығыс бөлігінде қалай жүзеге асып жатқанын көрдік. Алдымен ағаштардың түрлі сұрыптағы жиынтығы, орманның ортасына қарағай, шырша, аққайың секілді ағаштар отырғызылды. Әрі қарай орман өзі гүлдеп-өніп, ағаштар мен жасыл-желек көбейеді. Қазір біздің басты міндетіміз – орманды қайта түлетіп, ағаш-теректерді отырғызу, қаланы қоршаған орманды дамытуымыз қажет», деді Мемлекет басшысы Нұрсұлтан Назарбаев «жасыл белдеуді» аралаған соң БАҚ өкілдеріне арналған брифингте.
Елбасы жыл өткен сайын орманның аумағы ұлғайып, көкжелек көкжиегі кеңейіп келе жатқанын тілге тиек етті. Мемлекет басшысы қала маңындағы орман алқабы елорданың қолайлы климатын қалыптастырып, экологиясын жақсартуда маңызды рөл атқаратынына тоқталды. Сондай-ақ, өз елінің нағыз патриоттарын тәрбиелеп өсіруде табиғатты сақтаудың және туған жерді құрметтеудің маңыздылығын ерекше атады. «Бұл орман – таза ауамен тыныстауға мүмкіндік беретін еліміздің «өкпесі». Орман қаланы желден, шаңнан қорғайды, тазалыққа үлес қосады. Бұл – біздің ұрпағымыз үшін жасалып отырған сый, болашаққа ескерткіш. Астанада ЭКСПО-2017 халықаралық көрмесі өтіп жатыр. Ол «жасыл дамудың» қағидаттары мен идеясын ұстанатын қала ретінде Астананың имиджін нығайтуға септігін тигізеді. Елорда ішіндегі саябақтар да белсенді түрде жақсартылуда. Біз жасыл энергетикамен, табиғатты көркейтумен айналысудамыз», деді Нұрсұлтан Назарбаев. Президент, сондай-ақ, бұл жерде ағаш отырғызу оңай болмаса да, орманшылар ауқымды жұмыс атқарғанын айтып, ғалымдар мен орманшыларға алғысын білдірді.
Мәлім болғандай, елорданың жасыл белдеуіндегі екпе ағаштарының жалпы санитарлық жағдайы тұрақты. Бүгінгі таңда мұндағы жұмыстар ғылымның сүйемелдеуімен жүргізілуде. Ғылыми-зерттеу жұмыстары бірнеше бағытта, мәселен, жасыл белдеудің көшеттерін орман-потологиялық зерттеу, ғылыми-тәжірибелік аймақтарда орман өсімдігі түрлерінің жағдайын зерттеу, кесіп-күту әдістерінің ағаштарға әсері сияқты бағыттарда жүзеге асуда. «Жасыл белдеуде» жан-жануарлар құрамын арттыру бойынша да жұмыстар қатар жүргізіліп жатыр. Себебі, жасанды орманның өсімдік әлемі мен жануарлар құрамы да қатар дамуы қажет. Алты жылдың ішінде жұмыртқадан инкубация арқылы 8083 құс шығарылып, 7683-і еркіндікке жіберілген екен. Кеше де шара соңында Мемлекет басшысы орманға қырғауылдар мен еліктерді жіберу рәсіміне қатысты. Президент кеше, сондай-ақ, орман алқабының аумағын тікұшақпен аралап көрген соң, «Балқарағай» демалыс аймағында орналасқан этноауылда болды. Онда Мемлекет басшысының төрағалығымен Астананың «жасыл белдеуін» дамыту мәселелері жөніндегі кеңес өтті. Оған Президент Әкімшілігінің Басшысы Ә.Жақсыбеков, Астана қаласының әкімі Ә.Исекешев, Ақмола облысының әкімі М.Мырзалин, Премьер-Министрдің орынбасары – Ауыл шаруашылығы министрі А.Мырзахметов қатысты. Елбасы жасыл аймақты дамыту үшін атқарылып жатқан жұмыстардың барысы мен оны одан әрі көгалдандыру жоспарларымен танысты. Кеңесте Ауыл шаруашылығы вице-министрі Е.Нысанбаев есеп берді. Е.Нысанбаев отырғызылған көшеттердің жағдайына ұдайы мониторинг жасап, республикамыздың кәсіби ұйымдарының қатысуымен ғылыми-зерттеу жұмыстарын жүргізу Астана қаласы маңында «жасыл желекті» қалыптастыруды қамтамасыз ететін негізгі шара болып саналатынын айтты. «Жасыл белдеуде» 2020 жылға дейін үш негізгі бағыт бойынша жұмыс жүргізу жоспарлануда. Бірінші – жасыл белдеуді дамыту, яғни ықтырмааралық кеңістігінде егіс жұмыстарын жалғастыру. Осы мақсатта ықтырмааралық кеңістіктегі 1589,2 гектар аумаққа 2,1 миллионнан астам ағаш көшеттері отырғызылған. Соның ішінде 51 пайызы қылқан жапырақты түрі, ал 49 пайызы жайпақ жапырақты түрі. 2018 жыл мен 2030 жыл аралығында 5730 гектар аумаққа ағаш отырғызу көзделген. Екінші бағыт – қала аумағындағы бос жерлерде орман алқаптарын жасау. Президенттің тапсырмасын орындау аясында «үздіксіз көгалдандыру» бойынша жұмыстарды ұйымдастыру үшін бірыңғай орман алқабын құру мақсатында қосымша 14 849 гектар бос жер «жасыл сыналар» құру үшін бөлінген. Жалпы, елорда аумағында табиғи-ландшафтты 26 676 гектарға дейін жеткізу жоспарланған. Үшінші бағыт – елорданың жасыл белдеуін дамыту үшін рекреациялық аумақтарды жасау. Халықтың жаппай демалатын аумағын қалыптастыру. Бұл үшін 2016 жылы жасыл белдеу аумағында 23 шақырымды құрайтын асфальтталған велосипед жолдары салынған. Велосипед жолдарының құрылысы жаңа технологиялық стандарттармен жасалған. Онда тіпті велосипед тебуге келетіндер үшін автотұрақтар салынып, арнайы орындықтар қойылған. Келешекте мұндай велосипед жолдары желісін қаланың айналасында 258 шақырымға дейін жеткізу жоспарланған. 2020 жылға қарай Астана маңының орман аумағы 100 мың гектарға жеткізілмек. Динара БІТІКОВА, «Егемен Қазақстан» Суреттер Президенттің баспасөз қызметінен алынды