3 шілде күні ашылған фестивальде Жанғали Жүзбай, Айгүл Үлкенбаева, Сержан Шәкіратов сынды күйшілер, «Тұран» этно-фольклорлық ансамблі, Еркін Шүкіманов, Ерлан Рысқали, Клара Төленбаева сынды әншілер, қобызшы Саян Ақмолда, тағы да басқа қазақстандық дәстүрлі музыканың майталмандары өнер көрсетті. Көрермен қауым құмық жыршысы Зуганат Чунаева, Тувадан келген өнерпаз Николай Ооржак, монғолиялық сыбызғышы Бауыржан Мұхаметбай, әзербайжандық Арсылан Новраслы және басқа да хас шеберлердің өнеріне қол соқты. – «Астана – Арқау» – түркі халықтарының тамыры тереңде жатқан музыкалық мұраларын дамытуға, туыстас халықтардың арасында мәдени байланыс орнатуға бағытталған шара, – дейді ұйымдастырушылар. Түрік мәдениетін жаңғыртуға, ұлттық дәстүрді насихаттауға, халық бірлігін нығайтуға үлес қосып жатқан шара биыл оныншы жыл қатарынан ұйымдастырылғанын атап өткен жөн.
Айбын АҚПАТША