Шілде – жаздың ең ыстық айы. Әдетте, күн ыстықта ақ ешкінің әжем түткен түбітіндей ақша бұлттар аспанда қалқыр еді. Күн сәулесімен шағылысып, кейде қақталған ақ күміс жүзгендей әсер де беретін. Биылғы жазда қостанайлықтар дәл сондай ақша бұлтты көп байқамағаны рас. Жөңкіген қорғасындай ауыр бұлттар шілдені емес, күзді еске салады. Шілде айы туғанда облыстың оңтүстігіндегі Әулиекөл ауданына қарасты Диев ауылының үстіне үйірілген бұлтты ауыл тұрғыны Павел Громов ұялы телефонына түсіріп алған екен. Ол әлеуметтік желілерді дүрілдетті. – Қорқынышты, қою бұлт құйын секілді ауылды орап алатындай көрінді. Мен түсірген соң артынша тасырлатып бұршақ жауды, – дейді П.Громов. Шілденің бас кезінде аспан жарылып, жерге түскендей күркіреп, қатты найзағай ойнаған жаңбырлы күндер аз болмады. Оны «Казгидромет» ауа райын болжау орталығы облыстық филиалының мамандары ылғалдың молдығынан деп отыр. – Аспанда бұлттардың бауырлап жөңкуі – әдетте мұхиттарға жақын теңіз климатына тән құбылыс. Соңғы уақытта Атлант мұхитынан соққан қуатты циклондар ылғалы мол бұлттарды айдап келді. Шілденің «шырқын бұзған» «күзгі» және «құйын» бұлттарға көзіміз үйренбей жатқаны осыдан, – дейді «Казгидромет» ауа райын болжау орталығы облыстық филиалының инженер-синоптигі Валентина Загребина. Ауа райын болжаушылардың айтуына қарағанда, Тобыл өңірінде шілде айының аяғына дейін шіліңгір емес, жаңбырлы болайын деп тұр.
Нәзира ЖӘРІМБЕТОВА, «Егемен Қазақстан»
ҚОСТАНАЙ