Жеңіл өнеркәсіп саласының бір тармағына жататын кілем өндірісі Тәуелсіздіктің алғашқы жылдары тоқырауға ұшырағаны белгілі. Ел енді ес жиып жатқан елең-алаң шақта өндірістің қай саласында болмасын осындай түйткілді проблемалар ұшырасып отырды. Шикізат тапшылығы, білікті мамандар мен кәсіпорындардың аздығы сияқты бірқатар мәселелер бұл салаға да салқынын тигізбей қалған жоқ. Кешегі кеңес тұсында дәуірі дүркіреп тұрған «Алматы кілем» фабрикасы еліміздегі кілем өнеркәсібінің көшбасшысы болған еді. Алайда, қатал нарықтың қыспағы аталған фабриканы да айналып өтпеді. Осылайша, сол кездегі ел аумағындағы жалғыз фабрика жабылып тынды. Базарлармен сауда орындарында кілемдерді көтерме бағамен сататын орталықтар көбейді. Иран мен Түркия, Пәкістан асып келген кілемдердің бағасы тым қымбатқа соқты. Бағасы төмендеу дегендерінің сапасы сын көтермеді. Осы сәтте отандық тұтынушыларды сапалы өніммен қамти алатын отандық өнімдер ауадай қажет еді. Заман жылжып, уақыт сырғыған мезетте инновациялық технологиялар пайда болып кілем тоқудың жаңа қондырғылары дүниеге келді. Автоматты тоқыма машиналармен желімге отырғызып тоқудың нарыққа енгеніне де аз уақыт болған жоқ. Таза жүн мен жібектен тоқылатын табиғи кілемдердің орнын химиялық заттардан, мұнай-газ қалдықтарынан жасалатын акрил, полипропилен, ағаш қалдықтарынан жасалған вискоза сияқты жіптер алмастыра бастады. Мамандардың айтуынша мұндай шикізаттардан жасалған кілемдердің де төзімділігі жаман емес. Салмағы жеңіл, кір көтерімді, оңай тазаланады әрі өңі әдемі. Бүгінгі таңда мемлекет тарапынан жеңіл өнеркәсіптің өрге басуына көп қолдау жасалуда. Мемлекеттік бағдарламалар іске асып, тың жобалар қолдау тапты. Солардың бірі 2011 жылы Индустрияландыру картасы аясында «Оңтүстік» арнайы экономикалық аймағында құрылған «Бал Текстиль» ЖШС отандық алғашқы кілем тоқыма фабрикасы. Аталған өндіріс ошағы 2013 жылдың қазан айынан бастап өз өнімін шығара бастады. Фабрика қуаттылығы қазіргі таңда жылына 5 млн шаршы метр кілем және кілем өнімдері мен 4 000 тонна полипропиленді жіп өнімдерін құрайды. 2000-ға жуық кілем дизайны бар компания аз уақыттың ішінде халықаралық сапа конкурстарынан жүлделі орындар иеленіп үлгерді. Бүгінге дейін фабрика 4 865,5 мың шаршы метр кілем және кілем өнімдерін шығарса, оның 30 пайызы экспортталған. – Өндірістік кілем өнімдері Қазақстанның барлық аймақтарында, облыс қала және аудандарда халыққа қолжетімді бағамен сатылуда. Отандық өнімдеріміздің сапасы шетелдерден келетін кілемдерден ешқандай төмен емес. Фабрикамыз 2014 жылы «Алтын Сапа-2014» республикалық сапа конкурсының «Халық тұтынатын үздік тауар» номинациясында 2-ші дәрежелі диплом иегері, 2016 жылы Швейцарияның Женева қаласында өткен халықаралық конвенцияда үздік сапа номинациясы бойынша ISAQ жүлдесі – «Алтын Жұлдыз» иегері атанды. Шикізаттардың басым бөлігін шет мемлекеттерден, нақтырақ айтсақ Бангладеш, Түркия, Иран елдерінен әкелеміз. Қолымыздан келгенін өзіміз өндіреміз. Бастапқы кезде қиын болғанын жасырмаймыз. Кейіннен шаруамызды дөңгелетіп әкеттік. Өнімдеріміз отандық нарықты толық жаулап алмаса да, жоғары деңгейде сұранысқа ие. Яғни, біздің кілемдерді еліміздің кез-келген нүктесіндегі сауда орындарынан табуға болады. Сонымен қатар, Қырғызстан, Ресей, Әзербайжан, Тәжікстан, Франция және Швецияның ең үлкен сауда желісі – ИКЕА арқылы Ұлыбритания мен Германия мемлекеттеріне өнімдерімізді экспорттадық. Мемлекет тарапынан үлкен қолдау көріп отырмыз. Жер салығы, мүлік салығы, корпоративтік салық сияқты салық түрлерінен босатылдық. Мақсатымыз – отандық кілемдердің бәсекеге қабілеттілігін арттырып, әлемге әйгілі ету. Отандастарымызды өз өнімімізбен қамту, – дейді 240-тан астам адам жұмыс істейтін «Бал Текстиль» кілем фабрикасының директоры Талғат Исхахов. Еліміздегі тағы да бір отандық кілем тоқыма фабрикасы – «Назар Текстиль» де дәл осы Оңтүстік Қазақстан облысындағы «Оңтүстік» арнайы экономикалық аймағында орналасқан. Яғни, еліміздегі кілем ісінің көшін алға сүйреп жүрген осы аталған екі фабрика. Талғат мырза тілге тиек еткендей, отандық кәсіпкерлерді қолдау мен өнеркәсіп саласын өркендетуге мемлекет тарапынан көптеген көмек көрсетілуде. «Атамекен» ұлттық кәсіпкерлер палатасының баспасөз қызметі берген мәліметтерге сүйенсек өткен жылдың қорытындысы бойынша барлық ел аумағында жеңіл өнеркәсіп саласында шығарылған өнімдердің жалпы табыс көлемі 23,9 млрд теңгені құраған. Әсіресе, тоқыма өнімдерінің өсу қарқыны ерекше байқалады. Экспортқа шығарылған тауар көлемі – 72,8 млн доллар. Бұл дегеніңіз, алдыңғы жылдармен салыстырғанда экспорт көлемінің 5 пайызға өскенін аңғартса керек. Еліміз бойынша 984 кәсіпорын бар десек, оның тоқсан бесі – 13 мың адамды жұмыспен қамтып отырған кіші кәсіпорындар. Өткен жылы ғана «Бизнестің жол картасы-2020» бағдарламасы аясында құны 5млрд 94 млн тұратын 35 жоба қолдау тапқан. Ал еліміздегі «Даму» кәсіпкерлікті қолдау қоры да жеңіл өнеркәсіп саласындағы біраз жобаларды қаржыландырған. Қор басшысы Ғабит Лесбековтің айтуынша бір ғана 2015 жылдың өзінде жеңіл өнеркәсіп бойынша 109 жоба мақұлданып, жалпы сомасы 23 199 млн теңге несие берілген. Төленген субсидия көлемі 422,9 млн теңгені құрайды. Аймақтық бөлікте субсидиялау келісімі бойынша Оңтүстік Қазақстан облысында 19, Алматы қаласында 11, Жамбыл облысында 10, Павлодар облысында 9, Ақмола облысында 9 жобаға қол қойылған. Бұл салалық бөліністе субсидияланған жобалардың басым бөлігі тоқыма өндірісі. Яғни, 2015 жылдың көрсеткіші бойынша жалпы құны 3 034,8 млн тенге тұратын 66 жоба қаржыландырылған. Бұл белгілі кезеңдерде ғана көрсетілген көмектер тізбегі. Жалпы сандарды саралар болсақ жеңіл өнеркәсіп саласына, оның ішінде біз сөз етіп отырған кілем тоқыма өндірісіне аз қолдау көрсетіліп жатпағанын аңғаруымызға болады. Кілем және тоқыма өнеркәсібі еліміздегі мұнай, газ, басқа да салаларға қарағанда төмен бәсекелі блокқа жатады. Дегенмен, бұл саланың бір ерекшелігі айналым қаражаттарының айналмалылығында. Бұл өндірісте ішкі нарықты толығымен қанағаттандыратын өндірістік қуаттылықтар қалыптасып келеді. Саланың дамуын қамтамасыз етуге қабілетті ғылыми-өндірістік потенциал жеткілікті деңгейде сақталған. Еліміздегі іргелі сауда орындарының қай-қайсысына бара қалсаңыз да кілемнің түр-түрін кездестіруге болады. Көздің жауын алатын әйгілі Иран кілемдерінен бастап Түркия, Пәкістан, Қытай өнімдері де самсап тұр. Олардың арасынан өзімізде өндірілген кілемдерді де көптеп кездестіресіз. Асықпай таңдау жасауға мүмкіндік мол. Баға айырмашылығында бәлендей алшақтық жоқ. Тек, қолмен тоқылған кілемдер көркемдік өнерге жататындықтан әрі тоқуда көп еңбекті қажет ететіндіктен жоғары бағаланады. Жаңағы өзіміздің өнімдер дегеніміздің басым бөлігі жоғарыда айтқан «Бал Текстиль» мен «Назар Текстильдің» өнімдері. Кілем өндірісі мәселесінде қордаланып жатқан жайттар да аз емес. Өндіріске қолданылатын шикізаттардың қазіргі заманға бейімделген түрлерінің көбін өзге мемлекеттерден тасымалдаймыз. Себебі, өз елімізде өндірілмейді. «Осы проблеманы жолға қою үшін шикізаттар шығаратын зауыттар іске қосылса» дейді мамандар. Бұл мәселелер уақыт өте келе ретін тауып түзеле жатар. Ең бастысы, соңғы 5-6 жыл көлемінде елімізде екі бірдей іргелі кілем фабрикасы бой көтеріп ұлттық кілем тоқу ісін өрге сүйреп келе жатқаны көңіл қуантады.
Арман ОКТЯБРЬ, «Егемен Қазақстан» АЛМАТЫ