Ересектер мен әйелдердің Қазақстан құрамасы командалық есеппен 3 орын алса, команда құрамында Сабина Захарова, Екатерина Хуповец, Ермек Айназаров және Асылбек Мұратовтар қола жүлдеге ие болды.
Маңғыстау облысының әкімі Е. Тоғжанов карате-додан Азия Чемпионатының жеңімпаздарымен кездесіп, оларға бағалы сыйлықтар мен сертификаттар табыстады.
- Cіздер, Азия Чемпионатында аймағымыздың абыройын асқақтаттыңыз. Біз сіздердің жеңістеріңіздің арқасында сіздермен мақтанамыз. Болашақта үлкен жетістіктерге жетіп, еліміздің мәртебесін әлемдік деңгейде көтеруге тілектеспін. Сіздер, еліміздің, Қазақстанның намысын қорғап жүрсіздер, ал карате-до Олимпиадалық спорттың түріне жатады. Еліміздің туын көтеретін үздік спортшылардың қатарына кіруге ерекше мүмкіндіктеріңіз бар, - деген облыс әкімі Ералы Тоғжанов спортшылардың Азия Чемпионатында жақсы өнер көрсеткендері үшін алғыс білдіріп, карате-до спорт мектебі жаттықтырушыларының жұмысын жоғары бағалады. Сондай-ақ, спортшылар облыс әкімі Ералы Тоғжановқа аймақтағы спорттың дамуына қолдау көрсетіп отырғанына алғыстарын білдіріп, спорт әлемінде жоғары жетістіктерге жетуге уәде берді.
- Жаттықтырушылар, спорт мекемелерінің қызметкерлері мен басшыларының арқасында Маңғыстау спортшылары әр түрлі деңгейдегі жарыстарда, Әлем Чемпионаттары мен Олимпиада ойындарында облысымыз бен еліміздің абыройын асқақтатуда. Спортшыларды, жаттықтырушылар құрамын жеңістеріңізбен шын жүректен құттықтай отырып, сіздерге береке-бірлік, мықты денсаулық, сәттілік пен табыс, еңбектеріңізге жеміс тілеймін, - деп Қазақстан Республикасы карате-додан аға жаттықтырушысы, облыстық мамандандырылған балалар мен жасөспірімдер спорт мектебінің директоры Мансуров Парвиз Дунямали-оғлы айтты.
Гүлайым Шынтемірқызы,
«Егемен Қазақстан».
Маңғыстау облысы