Биыл жоба аясында Солтүстік, Шығыс, Батыс Қазақстан, Ақтөбе, Ақмола, Қостанай, Павлодар, Қарағанды, Атырау облыстарындағы жоғары және арнаулы орта оқу орындарына 4513 грант бөлінген. Оның 3793-і жоғары оқу орындарына, қалғаны колледждерге бөлініп отыр.
Айта кету керек, бүгінгі таңда Оңтүстік Қазақстан облысынан 5627 жас осы жоба аясында білім алып жатыр. Алғашқы қатысушылар диплом алып, жұмысқа орналасып үлгерген.
Жобаның артықшылығы сол, халқы тығыз орналасқан оңтүстік жастарының тегін білім алуына, өз мамандығы бойынша жұмысқа орналасуына мүмкіндік беріледі. Жұмыссыздық, балабақша мен мектептердің жетіспеушілігі секілді бірқатар әлеуметтік мәселелердің оң шешім табуға ықпал етеді. Ең бастысы, халқы сиреп жатқан солтүстік өңірлер қаракөздермен толығады.
Айта кетейік, соңғы үш жылда 9 облысқа – Солтүстік, Шығыс, Батыс Қазақстан облыстары мен Ақтөбе, Ақмола, Қостанай, Павлодар, Қарағанды және Атырау облыстарына 5627 түлектің 4698-і жоғары оқу орнына түссе, 929 талапкер колледждерде білімін жалғастырған. Яғни, 2014 жылы «Серпін – 2050» бағдарламасы аясында жоғары оқу орындарына 1050 грант бөлініп, 540 талапкер оқуға түссе, 2015 жылы 5000 грант бөлініп өңірден 2580 түлек оқуға түскен. Ал 2016 жылы 3162 грант бөлініп, 1578 талапкер грант иегері атанған.