Ол – болаттан жасалған қылыш. Сүйектен жасалған тұтқа-сабының төменгі бөліктері сынған. Ептеп тотыққан. Қылыштың жүзіндегі көптеген кертпе іздері оның әскери қақтығыстарда пайдаланылғандығын көрсетсе керек. Қайқыланған пішіндегі қылыштарды «жатаған қылыш» деп те атайды. Қылыштың өткірленген жүзіне қарсы бетінің жарты түтік пішінді болып келуі, қылыштың әскери әрекеттерде қарсыласты тек шабу үшін ғана емес, түйреу мақсатына да арналғандығын аңғартып тұр. Жүзі мен сабының түйіскен жері жезбен көмкерілген.
Бұл қылышты бірегей жәдігерлер қатарына жатқызуға мүмкіндік беретін өзгеше белгісі бар. Ол – қылыш сабының төменгі бөлігіндегі 1798 жылдан 1809 жылға дейін Қоқан ханы болған Алим Хан немесе Бұхара әмірлігінің соңғы билеушісі Сеид Мір Мұхаммед Алим ханның аты жазылған жеке мөр бедерінің түсірілуі болып отыр. Бұған дейін хандар ұстаған, тұтынған заттар бұл қорық-мұражайда кездеспеген.
ХІХ ғасыр мен ХХ ғасырдың басындағы қазақ тарихына қатысты мәлімет көзі саналатын мұндай жәдігерлер тарих ақтаңдақтарын айқындауға сеп болар тың жаңалықтарға қол жеткізуге мүмкіндік беруі бек мүмкін. Оның үстіне мұндай белгілі бір тарихи тұлға есімінің жәдігер бетінде кездесуі оның экспонат тұрғысындағы құндылығын арттыра түсетіні белгілі.
«Егемен-ақпарат»