Салтанатты жиынның ресми бөлімінде Әділет министрінің орынбасары Эльвира Әзімова сөз сөйлеп, ЭКСПО-2017 көрмесін өткізуге Астананың үміткерлігін қолдағаны үшін Гамбияға ризашылығын білдірді. «Қазақ елі ТМД мен Орталық Азия мемлекеттері арасында дүниежүзілік ауқымдағы осындай маңызды іс-шараны бірінші болып өткізіп отыр. Осы көрмеде «Болашақ энергиясына» арналған әлемнің үздік ғылыми және инженерлік жетістіктері қойылған», – деді ол.
Вице-министр екі елді ислам ынтымақтастығы аясындағы достық қарым-қатынас байланыстыратынын айтты. Оның сөзінше, тамыз айында көрме алаңында ғылым мен технологияны дамытуға бағытталған бірінші саммит өтпек. Болашақта ЭКСПО құрылысы нақты жобалар түрінде жаңа атауға ие болады. Гамбияның сауда өнеркәсіп, аймақтық бірігу және жұмыспен қамту министрі доктор Айсату Туэль Қазақстанға қонақжайлылығы үшін алғыс айтып, болашақтағы нәтижелі ынтымақтастыққа мүдделі екенін жеткізді. «Біздің республикамыздан келген ресми делегация мен өнер қайраткерлеріне көрсетілген қонақжайлылықты жоғары бағалаймыз. Мен сіздерге жоғары мәртебелі Гамбия президенті Адам Барроудың сәлемін жеткіземін. Бізге мұнда өз үйіміздегідей қамқорлық жасалуда. Бұл сыйластықтарыңыз біздің жүрегімізде мәңгі ізін қалдырады», деген шетелдік министр қазақстандықтарға сауда және инвестициялық ұсыныстарын таныстыруға әзір екенін жеткізді. Жаңа Гамбия энергетика бойынша «жол картасын» аяқтаған екен. Ал ол инвесторларды жылы жағажайға тартуға септесетін көрінеді.
«Астанада өтіп жатқан ЭКСПО-2017 халықаралық көрмесіне күллі әлем көз тігуде. Себебі, дәл осында баламалы қуат көздеріне қатысты озық технологиялар ұсынылып, көптің көкейінде жүрген сауалдарға жауап алуға болады. Біз Қазақстанмен әрі қарай да байланысымызды бекемдеп, көрмедегі бірегей бастамаларды ел игілігіне қолдануды көздейміз», деп түйіндеді сөзін Айсату Туэль. Ресми бөлімнен кейін ұлттық сахнада Гамбиядан келген әртістер өнер көрсетті. Әсіресе, «Поло Джубу Бэнг» тобының ән-жыры қонақтарды тәнті етті.
Асхат Райқұл,
"Егемен Қазақстан"