ЭКСПО-2017 халықаралық көрмесіне арналған спорттық шаралар аясында футболдан Football Cup турнирі өтіп жатыр. Бұл бәсекеде бұрынғы футбол жұлдыздарынан құралған алты елдің командасы күш сынасуда.
Әлем жұлдыздары және Германия құрамаларымен бірге «А» тобына түскен Қазақстан футболшылары турнирді сәтті бастаған. Олар Германия құрамасын 8:6 есебімен жеңген болатын.
Ал екінші кездесуде жерлестеріміз Әлем жұлдыздарынан 4:7 есебімен жеңіліп қалды.
«В» тобында Италия, Португалия және Ресей құрамалары өзара күш сынасуда.
Желаяқтың жеңілісі
Лондонда жеңіл атлетикадан өтіп жатқан әлем чемпионатында әйгілі желаяқ, Олимпиаданың сегіз дүркін чемпионы Усэйн Болт 100 метрлік қашықтықта 9,95 секунд нәтижемен қола жүлдені місе тұтты.
Еске салсақ, бұл чемпионат ямайкалық аңыз адамның спорттық карьерасындағы жекелей сын бойынша жүгірген ақырғы жарысы болатын.
Ал бұл сында америкалық жүйрік Джастин Гатлин мәре сызығын 9,92 секунд көрсеткішпен бірінші болып қиып, әлем чемпионы атанды. Күміс медаль АҚШ-тың тағы бір атлеті Кристиан Коулманға (9,94) бұйырды.
Әзірлеген
Қайрат ЖҮНІСҰЛЫ