Алатау ауданында орналасқан №14 қалалық емхана − бастапқы медициналық-санитариялық көмек көрсететін дербес ұйым. Ол 35 мыңға жуық тіркелген жандарға медициналық көмек көрсететін ауқымды емдеу орталығы болып табылады.
Серік Сейдуманов мемлекеттік және үкіметтік бағдарламаларға, нәтижелі жұмыспен қамту және жаппай кәсіпкерлікті дамыту бағдарламасына қатысты сұрақтарға жауап беріп, жүйелі реформаларды жалғастырудың маңыздылығы жөнінде айтып өтті.
Денсаулық сақтау саласының қызметкерлері міндетті әлеуметтік медициналық сақтандыру жүйесін енгізу және Алатау ауданын қоғамдық көлікпен қамтамасыз ету жөнінде сұрақтар қойды. Сонымен қатар, дәрігерлер медицина саласы бойынша жоғары оқу орындарын бітірген түлектердің өз еңбек жолын бастапқы медициналық санитариялық көмек көрсету жүйесінен бастауын ұсынды.
– «100 нақты қадам» Ұлт жоспарын біздің елімізді және оның барлық саласын реформалау мақсатында нақты әрекет етуге ықпал ететін құжат деп айта аламын. Мұнда медицинаның алар орны ерекше. Ұлт жоспары бойынша міндетті әлеуметтік медициналық сақтандыру қабылданған заңдар шеңберінде 2018 жылдың 1 қаңтарынан бастап өз күшіне енеді. Алатау ауданындағы №14 емханада кездесу ұйымдастыруыма да нақты себеп осы болып отыр. Басты мақсат осы жүйенің іс барысында қалай жұмыс істейтінін көру, – деді Серік Сейдуманов.
Мәжіліс депутаты Алматы қаласына сапары барысында сондай-ақ, қалалық әуежайда, «Казферросталь» кәсіпорнында болып, мемлекеттік органдар және Қоғамдық кеңес өкілдерімен кездесулер өткізеді.
Бағашар ТҰРСЫНБАЙҰЛЫ, «Егемен Қазақстан»
АЛМАТЫ